Уттигъанну МахIачкъалалив «SENEM» тIисса Банкетру бай залдануву хьунни лакрал балайчи Садаят МахIаммадовал ихIсандалул концерт. Шикку хьусса арцу гьан дурссар хасъсса аьра­лий операциялунсса кумагран. Ва шамилчинсса концертри Садаятлул аьралийтуран кумаг баву мурадрай дуллалисса.

Концертрай гьуртту хьунни Лакрал театрданул хьхьичIунсса артистал: Саният Рамазанова, Аьбдул Мурадов, Халисат Батырбекова, мукунма Садаятлул дуллалисса ххаллилсса даврил чIарав бавцIунни культуралул зузалт, балайчитал Муъминат Юсупова, Абрек ХIажимурадов, Шарапи Ажубов, Артур Аминов, АьбдулхIамид Кьурбанов ва цаймигу. БувкIун бия ванил чIарав бацIан штабрайсса даврил уртакьталгу. Садаятлул ду­ллалисса ихIсандалул давурттая буслай, ванихь барчаллагь тIисса ихтилат бунни штабрал хъунаманал хъиривмур, полициялул майор Ума Аскерхановал.
Шиккува бусан, 2-мур ЦIувкIуллал шяравасса Садаят МахIаммадова буссар хасъсса аьралий операция байбивхьуния шинмай аьралуннан кумагран Хуршиловлул цIанийсса кIичIираву тIивтIусса штабрай зий. Ва цуппа ряххийлва лавгссар хасъсса аьралий операция нанисса кIанттурдайн аьралийтурансса ссайгъатирттащал. Жяматрал бавтIсса кумагращал, ссайгъатирттащал чара бакъа ванил цила шаппатуссагу бикIайссар. Махъва-махъсса аьрххилий нанисса чIумал ванил цила парникирттава дачIи тонна помидордал диян дунни штабрайн аьралийтуран, салатру, маринадру дувара куну.
Аьралийтурал бусласимунийн бувну, къинттуллух зузиминнал кумаг ххуйну бучIи ляхълай бур вайннайн барчаллагьрай бур.
Къабигьассар хъамитайпалун дяъвилул ишру нани­сса кIанттурдайн гьан. Амма, цукунчIавсса захIматшивурттах ва нигьачIаврих къабурувгун, Садаят, хъаттирдай кунма, лагай аьралийтурачIан. Вайри жула ПартIу ПатIимахъул. Щак ба­къар, иш багьарча, укун къучагъсса жула хъаннил ярагъгу кIунттил бугьантIишиврийн.
Барчаллагьри Садаятлун, цинявппагу ва кунмаминнан, вай­ннал чIарав бацIлацIиминнан. Зу дуллалимур чирину дацIаннав.
Андриана Аьбдуллаева