ХIакьину жула халкьуннаву нажагьсса бухьунссар МахIач­къалалив Хуршиловлул цIанийсса кIичIираву зузи­сса, жула аьралуннан хIат-хIисав дакъасса кумаг буллалисса штабрая къабавсса. Хасъсса аьралий операция байбивхьуния шинмай цикссагу тоннарду кьайлул, ччарча дука-хIачIанмур, ччарча лахха-ликканмур, къертту, аьркин дагьлагьисса техника тIайла дуркссар шичча аьрайн.

На нава хьуссара штабрай, кIул хьуссара шикку мудан зузиминнащал. ДакI ххари хъанай дия шикку мудан зузимигу, чIун-чIумуй бучIаймигу чIявуми жула лак бушиврия. Вайннал кIункIу буллай бур цала гъан-маччамигу, дус-ихтиварталгу. Уттигъанну 20 азарда къуруш арцулгу, цила чулухасса аьралийтурансса ссайгъатгу лавсун шиккун бувкIунни Каспийскалий ялапар хъана­хъисса КIувурдал шяравасса Гуржагьан Гьарунова. КIицI лаган, Гуржагьан чIярусса шиннардий Лакрал театрдануву зий ивкIсса ДАССР-данул халкьуннал артист, РСФСР-данул лайкь хьусса артист МахIаммад Мусалаевлул душри. Цуппагу ЗахIматрал ветеранни. «Дагдизель» заводрай зий 42 шин дурссар.
Укун буслай бур цуппа Гуржагьан:
– Ттул ппу МахIаммад Мусалаев фронтовикри. Буттал кIанттул цIанийсса Хъунмасса дяъвилий кIийлла щаву дирну ивкIссар. Ххувшаврищал зана хьуссар. Оьрмулул къаувччуну, 52 шинаву дунияллия лавгссар, ацIва оьрчIгу махъ кьабивтун. Ттул лас Шагьабуттин Гьарунов, уссу Сяид Мусалаев, душнил лас Рамазан Камалов цила чIумал Украиннаву къуллугъ буллай бивкIссар. Ласнауссил оьрчI Мурад Гьаруновгу хасъсса аьралий операциялул гьурттучири. Шамийлла щаву дирссар. ЦIана Воронежрай аьралуннал полициялул органнаву зий ур. Ттун ччан бивкIунни та Украиннал аьрщарай Ватандалул мурадру буручлай хьхьичI ххуттай бавцIусса жула аьралийтуран ттула чулухагу чIиви-хъунсса кумаг бан.
Хуршиловалийсса штабрай тай цалчинсса гьантрая шихунмай зий буссар ттул гъанчу Исмяил ва Мисиду Гьаруновхъул.
На хъунмасса барчаллагь учин ччай бура ва штабрай зузисса цинявннахь, вайнначIан аьралийтурансса ссайгъатру лавсун букIлакIиминнахь. Чирину бацIаннав. Жура Ххувшаву ларсун, та дяъви къуртал хьусса чIунгу ччяни дучIаннав.
Барчаллагь жула аьралийтураягу, тайннан кумаг буллалиминнаягу чичлачисса «Илчи» кказитрал зузалтрангу. На «Ил­чи» бучIаннин ссавур духларгун ялугьлай бикIайссара, — тIий бур Гуржагьан.
Аьралийтуран кумагран арцу дичлачими, ссайгъатру гьан буллалими чан хъанай бакъар. Вай гьантрай шиккун бувкIунни Гъумучатусса, цуппа Шалив ялапар хъанахъисса Мисиду ШяпихIажиевнал ва КIувратусса Луиза МахIаммадовал чулухасса кумаг.Та Буттал кIанттул цIанийсса Хъунмасса дяъвилул шиннардий кунма, къинттуллух хъуннасса хъар лархъун, жула халкьуннал ккаккан бунни цивппа аьралуннал чIарав бушиву.
Гьарица буллалимур чирину бацIаннав.
Андриана Аьбдуллаева