Вай гьантрай МахIачкъалалив, хасъсса аьралий операциялий чувшиврий жан дуллусса ХIажиев Мурад ялапар хъанай ивкIсса Зоя Космодемьянскаял цIанийсса кIичIиравусса 52-мур къатлул лажин чIирай ларчIунни къучагънал аьпа абад буллалисса мармарчарил ула.
Мероприятиялий гьуртту хьунни Дагъусттаннал бакIчинал жяматийсса советник, Дагъусттаннал Террорданийн къарщисса комиссиялул экспертътурал советрал жаваблувсса секретарь, тарихрал элмурдал доктор Юсуп ХIусайнов, Дагъусттаннал бакIчинал кумагчи, «Жизнь Благо» тIисса ихIсандалул фондрал (къучагъсса дагъусттанлувтурал аьпа абад бавриха, аьралийтуран гуманитар кумаг бавриха зузисса, миннал кулпатирттал чIарав бацIлацIиса фонд) учредитель МахIаммад ХIажимахIаммадов, Дагъусттаннал ХIукуматрал Террорданийн къарщисса комиссиялул экспертътурал советрал член, философиялул элмурдал доктор, чIярусса шиннардий ХIажиевхъал кулпатрал чIаххуврай бивкIсса Асият Буттаева, «Сила в единстве» тIисса жяматийсса организациялул каялувчи, Къучагъшиврул ордендалул заллу Убайдулла Ибрагьимовлул щащар, Дагъусттаннал ХIурматрал ордендалул заллу ПатIимат Пайзуллаева, къучагъ дуклай ивкIсса МахIачкъалаллал 31-мур школалул учительтал ва дуклаки оьрчIру, МахIачкъалаллал Ленинский райондалул администрациялул вакилтал, хасъсса аьралий операциялий жанну дуллуминнал нинухъру, кулпатру, Мурадлул дустал, гъан-маччами, чIаххув-чIарахми. Вайннал бунни Мурад дакIнин утлатисса, ванал чувшиврия бусласисса ихтилатру.
– Вирттал сагъну буссар, ми жунма дакIний буссаксса. ХIакьину ва ула тIитIлай, жува абад буллай буру хIакьсса патриот, Къучагъшиврул ордендалул заллу Мурад ХIажиевлул аьпа. Ватандалул мурадру буручлай ванал харж бувссар цала оьрму. Ватандалухсса ччаву жула оьтту-ттурчIавура дуссар. Ватандалул цIаний жанну дуллуссар жула вирттаврал Буттал кIанттул цIанийсса Хъунмасса дяъвилийгу, чувшиву ккаккан дурссар билаятрал мурадру буручлай Авгъан дяъвилул иширттавугу, 1999-ку шинал дунияллул террористътурайн данди бавцIунугу. ХIакьинугу жула чиваркI хьхьичI ххуттай бавцIуну, жандалий хIайп къаувкуну, билаятрал мурадру буручлай буссар. Цала къучагъшиврийну Мурадлул цал ттигу тасттикь бунни жува виртталсса буттахъал варистал бушиву. Жула буржри укунсса къучагътал дакIний битан ва вайннал эбратрай жагьилсса ник тарбия дуллан, – увкунни Юсуп ХIусайновлул.
– Магьдижатгу, ва кунмасса цаймигу, къучагъсса арсру тарбия бувсса нинухъру гьар кIанай, гьар мудан дяъвилийн къарщину бюхттулну гъалгъа тIун аьркинссар. Укунсса иширттаву нинухъру жулами, чилми къабикIайссар. Цумур-цагу дяъвилий кIивагу чулух ккулла ниттил къюкIливух буккайссар. ХIакьину шиккун бавтIсса цинявппагу цумур бухьурчагу, цукунсса бухьурчагу дяъви къакьамулсса инсанталли. Нагу миннавасса цара.
Хъунмассар жучIава арсурваврал чувшиврулгу, ПаччахIлугърал миннал кулпатирттаха дуллалисса аякьалулгу кьадру-кьимат. Ниттихъан цала къюву лялиян дан хъиннува захIматну бикIанссия ПаччахIлугърал чулухасса хъуннасса аякьа къадиркIссания. Зул къюву – му жулгу къювур, ххирасса нинухърув! Кьянкьа дувара. Зул арсру ва дунияллия цамур дунияллийнни лавгсса. Жува ттиния тихунмайгу минная гъалгъа тIий битаннав, миннал ххуллийх лавгсса цайми къахьуннав, – увкунни Асият Буттаевал, чIаххувдушнил Магьдижатлул дакI данмур буслай.
Ва кьини цила чIарав бацIан бувкIсса цинявннахь барчаллагь тIисса ихтилат бунни Магьдижатлул. ЛяличIисса барчаллагь увкунни ванил цила арснал аьпа уттава буллалисса ула лачIун кабакьу бувсса МахIаммад ХIажимахIаммадовлухь, цуппа кунма, къумасса, хасъсса аьралий операциялул арсру зевххусса ниттихъал, гъан-маччанал дакI данмур буллай, мудан чIарав бусса ПатIимат Пайзуллаевахь.
КIицI лаган, Мурадлул нину-ппу МахIаммад ва Магьдижат Кьубиял шяравассар. Увну ур Мурад 1985-ку шинал июнь зурул 11-нний. Жан дуллуну дур 2023-ку шинал август зурул 18-нний. Ванан дия 38 шин. Хасъсса аьралий операциялий ккаккан дурсса чувшиврухлу аьпалул хьуну махъ Мурадлун дуллуну дур Къучагъшиврул орден.
Ванал махъ ливчIунни кIива мюрщисса оьрчI: 3-мур класс къуртал бувсса Аьбдулла ва 1-мур класс къуртал бувсса ЛатIифа. Вайннал оьрмурду лахъи баннав.
Андриана Аьбдуллаева
