Аьрщи цIу дуклакисса, тIабиаьт чантI тIутIисса интнил гьантрай цинявгу лакрал щархъаву кIицI лагай буттал буттахъая шихуннай нанисса Хъарас щаврил байран. Вай гьантрай ЦIуликъяннал шяравугу гурну ларгунни интнил байран. Шикку гьуртту хьун бувкIун бия МахIачкъалалив ва личIи-личIисса шагьрурдай ялапар хъанахъисса ЦIуликъяннал жямат, бусравсса хъамал.
КIюрххила най дия Хъузала къурув укканнинсса хIадуршиннарду. Мюрщими ва жагьилтал хIадур хъанай бия байрандалул ца бутIану хъанахъисса спортрал бяст-ччаллаву гьуртту хьун.
Гьашинусса Хъузала ия ишбажаранчи Хизриев Руслан. Ванал чIарав бацIан бувкIун бия цинявппагу гъан-маччами, дустал. Хъурдаккаврил байрандалул ца ххуйшиву мугу дур, ва савав хьуну буттал шяравун батIай тийх-шийх ялапар хъанахъисса, хъунмасса хIаллай куннан кув къаккавксса шяраваллил агьлу, жагьилми кIул шай куннащал кув, цIакь шай жяматрал арарду. ХIасил, шяраваллий аргъ дизай.
Хъурдаккаврил байрандалущал шяраваллил жяматгу, хъамалгу барча буллалисса ихтилатру бунни райондалул ва шяраваллил администрациярттал вакилтурал. Хъирив чIюлу бувсса балчан хьхьичIну хъув увккунни Хъузала. Гъай кунни хъунил дазу. Хъузала хъарас щилай уна, жямат бия дуаьрду дуллай, баргъ-гъарагъи дакьиннав, хъу дюхъаннав, лухччинул чIан дуцIиннав, чIаллул бакI дуцIиннав, къурагьшиву къахьуннав, хъунасса Заннал цIими бишиннав тIий, лабизлай.
Хъарас щуну махъ, байрандалул ва Хъузалал савлугъран гьаз бунни дукьрахIанттил кьуртти. ЯлунчIинсса байран дан Кьуру лавсунни Маммаев Мисриханнул. Яла байбивхьунни мюрщиминнал ва хъуниминнал дянив лечаврил бяст-ччал, ххяххан бунни дучри. Ххув хьуминнан ва хьхьичIунсса кIанттурду бувгьуминнан дуллунни арцуйнусса бахшишру, бартри ва чIюлу дурсса ссихьри. Аьдат дуссар жагьилтал цала ссихьри буцай душваран дулун лагайсса.
Хъирив цинявппа бавтIунни авадансса ссупралухун. Дурну дия байрандалул аьдатравун дагьсса лакку дукрарду: дукьрахIан, хьхьахьхьари, ккунукрал ххункIру.
Байран хъинну гурну ларгунни. Ванил барачат щала жяматрайн бияннав, гьарица ужагърайн аваданшиву дучIаннав.
Андриана Аьбдуллаева
