Вай гьантрай Москавлив Р. ХIамзатовлул цIанийсса библиотекалуву чирчунни лакку мазрайсса диктант. ДакIнин бутан, ларгсса шинал хьхьичIунсса дагъусттанлувталгу, чIявусса бусравсса хъамалгу гьуртту хьуну шадлугърал даражалий тIивтIуссия Москавлив Р. ХIамзатовлул цIанийсса библиотека. Му чIумал пикри хьуссия шикку ччя-ччяни ДагъусттаннацIун, жула культуралуцIун, аьдатирттацIун дархIусса, жула багьу-бизу ккаккан буллалисса мероприятияртту дуллан. Вайннул лагрулий уттигъанну шикку чирчунни Дагъусттаннал миллатирттал мазурдийсса диктантру. Ларгсса нюжмардий дия лакку мазраймур диктант.
Ва даврил сакиншинначитал хьунни «Мега-фонд» тIисса ихIсандалул фондрал ва Аьрасатнал Патриотътурал жяматийсса советрал президент Тажуттин Исрапилов ва Аьрасатнал Художниктурал творчествалул союзрал член Шахризат Тахнаева.
Гьашинусса шин Аьрасатнал президентнал Ватан дуруччул шинну баян бувну бухьувкун, мукунма щалагу билаятрай Буттал кIанттул цIанийсса Хъунмасса дяъвилий Ххувшаву ларсун 80 шин хъанай духьувкун, лакрал диктантран язи бувгьунни цIанихсса шаэр, чичу, фронтовик Абачара ХIусайнаевлул «Ттул дяъви» тIисса текст.
Кьинилун хасну чIюлу бувну бия зал. Ккаккиялун дирхьуну дия Бархъаллал шяравасса цIанихсса къавтIала Къачу ХIаммадовлул кулпатраву ирсирай нанисса коллекциялувасса миллатирттал янна, художник-дизайнер БатIи Оьмаровал арцул кьай, Эльза Рамазановал душнил Белкизлул цила щаршсса шалданул карщив.
Мероприятие дачин дурну бия искусствовед-этнограф, Дагъусттаннал культуралул лайкь хьусса зузала, Аьрасатнал халкьуннал прикладной искусствалул мастер, «Союз национальностей» журналданул хъунама редакторнал хъиривмур, Къачул душ ХIаммадова ПатIимат.
Диктант дуккин вихшала дунни «Дагъусттан» МЦК-лул дуллалисса цинярдагу мероприятиярттай чялишсса гьурттушинна дайсса, Москавлив лакку мазрал дарсру дихьлахьисса, уттигъанну хасъсса аьралий операциялул гьурттучитуран хас бувсса «Чаннаннил чувшиву» тIисса шеърирдал жуж итабавкьусса Ххадижат ЦIаххаевайн.
Мероприятие дайдихьлай, лакрал тарихрая, миллатрал цIанихсса вакилтурая бусласисса ихтилат бунни политикалул элмурдал доктор Камил Ландал.
ПатIимат ХIаммадовал бувсунни Ххадижатлул оьрмулул ва захIматрал ххуллия, ванил шеърирдая, жяматийсса ва ихIсандалул давурттая.
Диктант чичлай байбишин хьхьичI Ххадижатлул бувсунни гьурттучитурахь шаэр, чичу, публицист, таржумачи, хьхьичIунсса аьлимчу Абачара ХIусайнаевлул оьрмулия ва творчествалия, дяъвилул ва элмийсса ххуллия.
Шаэрнал дяъвилул ххуллия буслай, Ххадижатлул дакIнин бувтунни школа къуртал бувну махъ Абачара хIаписар хьун ччай Орджоникидзе шагьрулий Бахьттагьалтрал училищалувун увххун ивкIшиву, дяъви байбишайхту, Ватан дуруччин лавгун, битултрал взводрал командирну ивкIшиву, 1943-ку шинал Дон неххайсса талатавурттаву захIматсса щаву дирну ивкIшиву.
Диктант чичлачиминнан асар хьунни шаэрнал дяъвилий цанма ккавкмуния бусласисса хавар. Диктант чирчуну махъгу хьунни лакрал аьдатирттаясса, багьу-бизулиясса ихтилатру.
Ххадижатлул назмурду дурккунни ЧIяйннал шяравасса ПатIимат МухIуттиновал ва авторнал цила. ХIакин-неврологсса ярудуш Заретта Кьурбановал увкунни яру мазрайсса ва лакку мазрайсса балайрду.
Ххаллилсса къавтIавуртту ккаккан дунни Диана Аьлиевал хIадур бувсса «Кавказ Денс» ансамбльданувасса къавтIалтрал.
ПатIимат ХIаммадовал кIул бунни мероприятиялул гьурттучитал миллатирттал янналул выставкалущал, балжину бувсунни шиккун дуккан дурсса цила буттал коллекциялувасса Дагъусттаннал халкьуннал янналия.
– Федерациялул советраву президентнал администрациялул сакиншиндарай хьусса «Народы России» тIисса выставкалийсса 25 костюмрава 10 костюм буттал коллекциялувасса дия. Укунсса даражалул выставкалийн, Антропологиялул, этнографиялул, тарихрал музейрдавасса чIярусса костюмирттава цимигу комиссиялул канилух ва итталухгу дурккун махъ, жул кулпатрал коллекциялува 10 костюм язи дугьаву – му хъунмасса ишри. Му бакъассагу, «Уникальная Россия» тIисса Гостиный дворданувусса выставка-форумрай зуруй ккаккиялун дирхьуну диркIссар жул коллекциялувасса 30 костюм. ТIааьнну бур, махъсса ппурттуву Дагъусттаннал халкьуннал тарихрах, культуралух, багьу-бизулух къулагъас ххишала шаву. ЛичIи-личIисса выставкарттай гьуртту хъанай, на мудангу буслан бикIара жула Дагъусттанная, лайкьсса дагъусттанлувтурая, машгьурсса аьлимтурая, лавайсса даражалул пишакартурая, магьирсса сянаткартурая, – увкунни ванил.
Лакку мазрайсса диктант лавайсса даражалий хьунни. Жула чIарав ххуйну бавцIунни яруссаннал миллатрал вакилталгу.
Шиная шинайн опыт салкьи хъанай, хъиннува чIявусса лак лагма лаган булланссар тIисса умуд бур.
