Буттал кIанттул цIанийсса Хъунмасса дяъвилий Ххувшаву ларсун 80 шин шаврин хас дурсса шадлугърал мажлисру хьунни ЦIуссалакрал райондалул щархъаву. ЦIуссалакрал райондалий мудангу Ххувшаврил байран дайдишай Гьамиящиял шяравусса Совет Союзрал Виричу Ханпаша Нурадиловлул гьайкалдануцI тIутIив дишаврийну.

Хъирив шадлугърал мероприятияртту дайдирхьуна Бу­ттал кIанттул цIанийсса Хъун дяъвилий жанну дуллусса вирттаврал ва 1999 шинал сентябрь зуруйсса дяъвилул иширттаву къучагъшиву ккаккан дурсса аьралийтурал гьайкаллацI тIутIив дишаврийну.
Шикку гьуртту хьунни ЦIу­ссал­акрал райондалул бакIчи МаматIи ХIамзатов, ДР-лул Халкьуннал Мажлисрал депутат Артур Исрапилов, ихтиярду дуру­ччай органнал зузалт, СВО-лул гьурттучитал, райадминистрациялул, шяраваллал идарарттал зузалт, депутатътал, Юнармиялул ва «Движение Первых» суккушиннарал активистътал.
Хъирив райондалул бакIчи хьхьичIну делегация лавгунни «Аьпалул багъравун». Шикку вайннал хасъсса аьралий операциялий жанну дуллусса вирттаврал мемориалдануцI тIутIив дирхьунни.
Шадлугърал мажлис тIитI­лай, ихтилат бунни МаматIи ХIамзатовлул:
– ХIакьину жува барча­ллагьрай дакIнин бичлай буру дяъвилул цIараву ва къинттуллух къучагъну талай бивкIми ва цIанасса ппурттуву Украиннал аьрщарай нанисса хасъсса аьралий операциялий гьуртту хъанай, къучагъшиву ккаккан дур­сса вирттал. Ххувшаврил байран – душманнаща лахIан бан къавхьусса жула халкьуннал кьянкьашиврул лишанну хъанахъиссар. Миннал дазу-зума дакъасса чувшиврийнур жущава оьхIалсса душмангу ххит увну, Ххувшаву ласун бювхъусса, – увкунни ванал.
Ххувшаврил байран бюхттулсса даражалий тIайла дур­ккунни ЦIуминалийсса ЦIуссалакрал райондалул шяраваллавугу.
Райондалул делегация бивунни ЦIуссаккуллал шяравусса Совет Союзрал кIийла Виричу АхIмад-Хан Султаннул, ЦIуссалакрал шяравусса Аьрасатнал Виричу Мутай Исяевлул, Шушиннал шяравусса Аьрасатнал Виричу Дмитрий Серковлул ва хасъсса аьралий операциялий чувшиврий жан дуллусса Къучагъшиврул ордендалул кавалер Муртаза Султановлул аьпалул улттуцI, Аьхъардал ва Шушиннал шяраваллава Хъун дяъвилийн лавгсса вирттаврал гьайкаллацI тIутIив дишин. Шикку дакIнин бивчу­нни Хъун дяъвилий Ххувшаврил цIаний талай бивкIми ва цIанасса чIумал хасъсса аьралий операциялул иширттаву къучагъну талатисса ва жанну дуллусса вирттал.
Байрандалул сий хъиннура гьаз дунни махъсса шиннардий аьдатравун дагьсса «БивкIу бакъасса полк» акциялулгу.
Ххувшаврил ЯтIул ттугълищал, буттахъал, буттал бу­ттахъал суратирттащал акциялул гьурттучитурал кьюкьа ларгунни Хъун дяъвилия зана къавхьуминнал гьайкалдануцI тIутIив дишин.
Байрандалун хасну райондалул Культуралул управлениялул зузалтрал сакин дурну дия аьралий-патриот балайрдал концерт.
Байрандалул мероприятиярттал лагрулий Гьамиящиял шяравусса кIичIираваллин дирзунни Совет Союзрал Виричу Ханпаша Нурадиловлул цIа.
Гьамиящиял шяравусса школалийгу хьунни «Вирттаврал партарду» тIитIлатIисса шадлугърал мажлис. Вай тIиртIунни хасъсса аьралий операциялий къучагъшиврий жанну дуллу­сса ХIусайн Шабановлун ва Абас ХIамзаевлун. Аьпалул мажлисрай гьуртту хьунни ХIусайннул нину Жунид Шабанова ва Абаслул нину Полина ХIамзаева, школалул коллектив ва дуклаки оьрчIру.
«Вирттаврал партардал» биялалийну дуклаки оьрчIан абадлий дакIний личIантIиссар къучагъсса ватанлувтурал цIарду.

Лажин хIадур дурссар
Имара Саидовал