Майрал 9-нний щалагу билаятрай лахъа-хъунну кIицI ларгунни Ххувшаврил 80 шинал юбилей. Ххувшаврил байрандалун хас дурсса мероприятияртту хьунни Ккуллал райондалул щархъайгу.

Ва кьини райондалул шяраваллавусса Хъун дяъвилул гьур­ттучитурал гьайкаллацI дирхьу­нни тIутIив, хьунни «БивкIу бакъа полкрал» маршру, шяраваллал культуралул къатрал зузалтрал, дуклаки оьрчIал хIадур дурсса тяхъашивуртту.
Ваччиял шяраву Ххувшаврил байрандалий гьуртту хьунни Ккуллал райондалул бакIчи Шамил Рамазанов, ФСБ-лул полковник Артур Амутинов, Кку­ллал ва Лакрал районнал аьралий комиссар Гъази МахIаммадов, СВО-лул гьурттучи, «Память гор» тIисса организациялул Ккуллал райондалийсса отделениялул хъунама Нураттин Рамазанов, хасъсса аьралий операциялул гьурттучитал.
Байрандалийн бувкIминнахь дия Хъун дяъвилийн лавгсса ттаттахъал суратру. Дуклаки оьрчIру ва мюрщулт бия аьралий яннардаву.
Ххувшаврил байрандалул митинг тIитIлай, жямат ва бусрав­сса хъамал барча бунни Ккуллал райондалул администрациялул бакIчи Шамил Рамазановлул:
– ХIакьину жува барча­ллагьрай буру ва ник ришлай буру Хъун дяъвилул цIараву ливтIуминнал, ятIа-тIар бакъа бакъахьуминнал ва жуятува лавгсса цинявппагу ветерантурал, къинттуллух захIмат буллай бивкIминнал хьхьичI. Вайннал бувсса гьунарду ва къучагъну лавгсса оьрмурду абадлий дакIний личIантIиссар. Хъун дяъвилий чувшиврул ва патриотизмалул эбратну хьуссар Совет Союзрал кIийла Виричу АхIмад-Хан Султан, Совет Союзрал вирттал Якьуб Сулайманов, ХIажи Бугъанов, ЦIаххай Маккаев, Ризван Сулайманов ва цаймигу вирттал. ХIакьинугу,хасъсса аьралий операциялий Ватандалул мурадру бартбигьлагьисса къучагътурал чувшивурттайну тарбия дуллан аьркинссар ялун нанисса ник, – увкунни ванал.
Ихтилатирттая махъ байрандалул гьурттучитурал тIутIив дирхьунни Совет Союзрал кIийла Виричу АхIмад-Хан Султаннул гьайкалдануцI.
Хъирив ЧIяйннал шяраваллил шанбачIулий дацIан дурсса ЦIаххай Маккаевлул гьайкалданучIату Ваччиял шяравусса майданнивсса АхIмад-Хан Султаннул гьайкалданучIан бияннинсса «БивкIу бакъасса полкрал» марш хьунни.
Фронтовиктурал суратирттащал «БивкIу бакъасса полкравух» гьуртту хьунни Ккуллал райондалул щархъал жямат.
Райондалул Культуралул центрданул зузалтрал, школардал ва оьрчIал багъирдал коллективирттал ккаккан дунни аьралий-патриот балайрдал концерт.
Ххувшаврил байрандалун хас дурсса мероприятиярттал лагрулий ЧIяйннал школалий тIивтIунни цIу буккан бувсса Совет Союзрал Виричу ЦIаххай Маккаевлул цIанийсса музей. Шиву дур ЧIяйннал шяравасса Хъун дяъвилул, СВО-лул ва Авгъан дяъвилул гьурттучитурацIунсса авадансса материаллу. Школалул директор Альбина ХIаммаккуевал бувсунни музей сакин баврил тарихрая ва гихуннай дуллантIисса давурттая.
Вара кьини ЧIяйннал школалий тIиртIунни Хъун дяъвилул ва СВО-лул «Вирттаврал партарду». Хьунни дуклаки оьрчIру Юнармиялул кьюкьравун кьамул бу­ллалисса шадлугърал мажлисгу.
Оьрус мазрал дарсирдал учительница Кьудуева Виолеттал дирхьунни Ххувшаврил 80 шинал юбилейран хас дурсса тIиртIу дарс. Ахирданий школалул коллективрал, дуклаки оьрчIал ва байрандалул гьурттучитурал рирщунни дакIний личIансса суратру.