Гъумук хьунни Ххувшаврил 80 шинан хас дурсса, аьдатравун дагьсса автопробег «Знамя Победы». Ва хъанай дур махъсса ххюра шинал лажиндарай Ххувшаврил кьинилул хьунийн лув-ялув дуллалисса Щалагу Аьрасатнал акция.
Ххувшаврил ЯтIул ттугъал, Аьрасатнал ттугъал, «Георгиевский лентардал» ва цаймигу Ххувшаврил лишаннал чIюлу бувсса кьуваксса куклумашинарттал кьюкьа, Лакрал дазуя сукку хьуну, Гъумучиял ппаччахI-ххуллийхчил Ханнал Бярнил лагмагу дурккун, дуркIунни Буттал КIанттул цIанийсса Хъун дяъвилия зана къавхьуминнан дацIан дурсса гьайкалданучIан. Шикку ватандалул ххуллий жанну дуллуми дакIнин бивчунни.
