Майрал 7-нний, шагьрурдая бусравсса хъамалгу бувкIун, Гъумук Жагьилтурал паркрачIа тIивтIунни Совет Союзрал Виричу Якьуб Сулаймановлул бюст.
Мероприятиялий гьуртту хьунни ДР-лул Халкьуннал Мажлисрал хъунаманал хъиривчу Камил Давдиев, культуралул министр Зарема Буттаева, ДР-лул Халкьуннал Мажлисрал Законодательствалул ва кIанттул цилакаялувшиндарал комитетрал хъунама Артур Исрапилов, Халкьуннал Мажлисрал депутат Марат Илиясов, Жяматийсса палаталул хъунаманал хъиривчу Ссапарбаг Аьбдуллаев, МахIачкъала шагьрулул Кировский райондалул администрациялул бакIчи СалихI Сагидов, «Дагестан» ГТРК-лул хъунама директорнал хъиривчу Ссалам Хавчаев, М. ХIажиевлул цIанийсса заводрал хъунама директор Аьбдулвагьаб Папалашев, Якьуб Сулаймановлул арснал арс МахIаммадаьли Сулайманов, ишбажаранчи ва меценат Аслан Аьлиев, Дагъусттаннал халкьуннал художник МахIаммадаьли Аьлиев ва чIявусса цаймигу .
«ХIурмат бусса хъамал! ХIакьину жува бавтIун буру жула аьпалул бурж биттур бан – Совет Союзрал Виричу Сулайманов Якьуб МахIаммад-Аьлил арснан гьайкал тIитIин. Ва гьайкал хъанахъиссар Виричунал аьпалул хIурматрал ва бухкъалагайсса барчаллагьрал лишанну. Ва жула аьмсса аьпари, бюхттулсса Ххувшаву жула агьалинан ци кьиматран дарцIуссарив жунма тачIав хъамакъабитантIишиврий буллалисса хъар. ЦукунчIавсса щак бакъар ва гьайкалданучIан букIлантIишиврий жула хъирив нанимигу, Виричу дакIнин утан, аьпа учин.
Якьуб Сулаймановлул гъанчунащал жу ччянива ххал бигьлай буссия ганал буттал шяраву, Гъумук, гьайкал дацIан даврил ялувсса пикри. Дан багьлай бия хъуннасса хIадуршиндарал даву. Сакиншиндарал давуртту ва щала харжлугъ цала бакIрайн лавсуна «Югмонтажспецстрой» ЗАО-лул хъунама директор ХIасан Аьлиевлул. КутIасса чIумул мутталий ванал коллективраща бювхъунни аьркинсса давуртту щаллу дан. Хъунмасса кумаг ва ишираву бунни жула Виричу дяъвилия махъ чIярусса шиннардий зий ивкIсса МахIаммад ХIажиевлул заводрал хъунама директор Аьбдулвагьаб Папалашевлул, цан хъунмасса барчаллагь», – увкунни Лакрал райондалул бакIчи Юсуп МахIаммадовлул.
Гьайкалдания пардав лирккунни Виричунал арснал арс МахIаммадаьли Сулаймановлул, Аьбдулвагьаб Папалашевлул ва ХIасан Аьлиевлул арснал ХIусайннул. Муния махъ шадлугърайн бувкIминнал дирхьунни гьайкалдануцI тIутIив.
«ХIакьину, ва гьайкал тIитIлай, жува душманная ватан дуручлай бивкIминнал аьпалул хIурмат буллалиссару», – увкунни Камил Давдиевлул.
Буттал кIанттул цIанийсса Хъунмасса дяъвилул вирттаврал аьпа абад баврил ва райондалий ялун нанисса ник ватан ххирану тарбия даврил ххуллийсса давурттахлу Юсуп МахIаммадовлун дуллунни ДР-лул Халкьуннал Мажлисрал хъунаманал цIа чирчусса ссят ва Барчаллагърал чагъар. Мура ссят ва Барчаллагърал чагъар буллунни Совет Союзрал Виричу Якьуб Сулаймановлул гьайкал дацIан даврил харжлугь цайнна ларъсса ХIасан Аьлиевлунгу.
Барчаллагьрал чагъарду буллунни гьайкалданул автор Дагъусттаннал халкьуннал художник МахIаммадаьли Аьлиевлун ва архитектор, «АПЦ «Зодчий» ООО-лул хъунама директор ХIажикьурбан ХIажикьурбановлун, Аьбдулвагьаб Папалашевлун.
Дагъусттаннал бакIчи Сергей Меликовлул цIания бавтIми барчагу бувну, Виричунал гьайкал дацIан даврил чIарав бавцIуминнахь барчаллагь увкунни Зарема Буттаевал. КIицI лавгунни щала билаятрай най душиву Хъун дяъвилул Вирттаврал, ватан дуручлай бивкIминнал ва къинттуллух захIмат буллай бивкIминнал аьпа абад буллалисса давуртту.
«Ва жула аьмсса гимнри Буттал КIанттул цIанийсса Хъун дяъвилий совет агьалинал дурсса виричушиврун цIа кусса, Ххувшаврил цIаний талай, зий, захIмат буллай бивкIминнал бухкъалагайсса аьпари. Укунсса давурттал агьамшиву лапра хъуннасса дур хIакьину, жула оьрчIру хасъсса аьралий операциялий цала ппухълуннал виричушивуртту ккаккан дуллалисса чIумал», – увкунни министрнал.
Якьуб Сулайманов дакIнин утлатисса ихтилатру бунни Артур Исрапиловлул ва Аьбдулвагьаб Папалашевлул.
Виричунал гьайкал дацIан давриву гьурттушинна дурминнахь барчаллагь увкунни Якьуб Сулаймановлул арснал арс МахIаммадаьли Сулаймановлул ва гъанчу Кьурбанисмяил Жидалаевлул.
Гъумучиял школалул дуклаки оьрчIал дурккунни назмурду.
Муния махъ Гъумучиял Магьирлугърал къатлул зузалтрал ва оьрчIал Магьирлугърал школалул тарбиялувтурал ккаккан дунни ххаллилсса концерт.
