Ххувшаврил байрандалул хьхьичI гьантрай Каспийскалий, Дагъусттаннал бакIчи Сергей Меликовгу гьурттуну, СВО-лул Вирттаврал аллея тIивтIунни. Ватандалул мурадру буруччаврил цIаний жанну харж дурсса къучагътурал аьпа уттава буллалисса ва даврил сиптачигу Сергей Меликов цува ур. Шагьрулул хъуниминнал ва меценатътурал кабакьаврийну Аллеялий бацIан бувну бур Аьрасатнал мукьа Виричунансса бюстру: МахIаммадаьли МахIаммаджановлун, МахIаммад Исбакиевлун, Михаил Васильевлун ва Фархад Худайнатовлун.

Вайннал гьайкаллацIгу, «Каспийск – захIматрал къучагъшиврул шагьрур» тIисса гьайкалдануцIгу тIутIив дишайхту, Сергей Меликовлул бюхттулсса кьимат бивщунни Вирттаврал гьунардан. Бувсунни ЦIийшиял шяравасса, Каспийскалий яхъанай ивкIсса, ГРУ-лул роталул группалул командирнал хъиривчу, прапорщик Фархад Худайнатовлул аьралий дустал ххассал буллай жан харж дуршиву, хъунама лейтенант МахIаммад Исбакиевлулгу, захIматсса щавурду дирну унува, цува каялувшиву дуллали­сса кьюкьлущал архIал хьхьичI бивхьусса бигар бартбивгьуну, цалламур жан кьурван дуршиву. МахIаммадлул ппу ур яруссаннал Аймаки шяравасса, нину Марина – ЧукIнатусса.
«Аьрасатнал Виричусса хIаписартурал гьунарду жула дакIурдивугу, аьралий гьалмахтурал дакIурдивугу ва Дагъусттаннал, Аьрасатнал тарихравугу личIантIиссар», – увкунни Меликовлул.
Вирттаврал бюстру тIитIав­рий гьуртту хьусса мачча-гъаннайн барчаллагьрай, Меликовлул увкунни: «ЦукунчIавсса мукъурттил ва ссалчIав зул къювурду лагь къадантIишиву кIулли. Амма вай хIакьинусса гьайкаллу, так чувшиврул, Ватандалуха къуллугъ баврил лишанну дакъагу, гьарманайн Ватандалул хьхьичIсса бурж биттур буван оьвтIисса лишанну хьунтIишиврийнсса умудгу бур».
Мероприятиялул бусравсса хъамаллуравух ия Буттал кIанттул цIанийсса Хъун дяъвилул ветеран Муса Багьауттинов. Сергей Меликовлул ветераннан дуллунни Ххувшаврил юбилейрал медаль ва республикалул чулухасса ХIурматрал орден.
ПатIимат Рамазанова