Ххувшаврил кьинилул хасну, майрал 8-нний, Бабаюртуллал райондалийсса ГьунчIукьатIрал даэлий, щарнил жяматгу, шагьрурдая ва чIаххуврайсса лакрал щархъавасса хъамалгу бавтIун, лахъа-хъунну тIиртIунни Буттал кIанттул цIанийсса Хъун дяъвилул гьурттучитурал аьпа абад буллалисса гьайкал. Ва агьамсса ва ххуйсса даврил сиптачишиву дурну дур Сангардал школалий сайки мукьцIалла шинай физикалул ва математикалул дарсру дихьлахьисса, ГьунчIукьатIрал шяравасса Дандамаев Шамил Оьмардул арснал.

Цурда ва даврил дайдихьу хьуну дур цаппара шиннардил хьхьичI, ГьунчIукьатIрал Жяматийсса суккушиндарал каялувчи  ХIусайнов ХIажибуттал  ГьунчIукьатIрал даэлийсса щарнил масъаларттаха зун цала хъиривчуну ацIан Шамиллухь був­сса тавакъюрая. Даэлий дансса давурттаха зунсса правлениягу сакин бувну, хIукму бувну бур шяравунсса ххуллу, хIатталлил лагмасса чапар, аьртIизан дакьин дан, шяравусса кIичIирттавусса ттукIрал тталлай прожекторду дишин ва цаймигу давуртту дан. Миннувагу хьхьичI ххуттайн лавсун бур Ххувшаву ларсун 80 шинал юбилейрал хьунийн, дяъвилия зана хьуну махъ, ГьунчIукьатIрал ва КIямашрал колхозрал даэлий зий-занай, хъунмасса захIмат бивхьусса 26 ветераннал аьпалунсса гьайкал дацIан данмур масъала. Шамиллул бусаврийну, арцуйну­сса кумаг буллай, гьайкал дацIан дансса кIанай давурттавух гьуртту хъанай, шайнал шаймур бувну бур ва даву дузрайн дуккан дан. КIямашрал жяматрал чулуха ванацIун кабавкьуну бур ши­кку увну, хъуна хьусса  Ибрагьимов Заирханнулгу.

Гьайкал тIитIлатIисса кьини шяравун увкIунни ххюцIалаксса инсан, миннавух – шикку зий-захIмат буллай бивкIминнал оьрчIру, оьрчIал оьрчIру.
Шамиллул ппу Оьмаргу Хъун дяъвилул гьурттучия, дяъви къуртал хьуну, 1947 шинал, Лаккуя даэлийсса колхозраву зун тIайла увккун, шиккува миналулгу хьуну, кулпатращал яхъанай ивкIсса.

Гьайкал тIитIлатIисса шадлугъравух гьуртту хьунни шяраваллил Культуралул къатлул зузалт ва дуклаки оьрчIру.
Шадлугърал ахирданий ХIажибутта ХIусайновлул Шамиллун Барчаллагьрал грамотагу дуллуну, шярава бувксса хьхьичIунсса инсантураясса луттирдугу пишкаш бу­нни. Барчаллагьрал махъру лавхъунни Хъун дяъвилул гьур­ттучитурал оьрчIалгу – миннавух Мусаева Нурижатлул, Айдиев МахIаммадлул, ХIусайнов ХIажибуттал, ГьунчIукьатIрал Жяматийсса сакиншиндарал каялувчинал хъиривчу Ибрагьимов Кьурбанаьлил, Жяматий­сса сакиншиндарал хъунаманал хъиривчу Дандамаев Хумарбаглул, ГьунчIукьатIрал шяраваллил бакIчинал хъиривчу Шуаьев Юсуплул, «ЯтIул ттугъ» СПК-лул хъунама Чавтараев Сиражуттиннул, ГьунчIукьатIрал школалул директор Къушиев Маликлул, «Илчи» кказитрал хъунама редактор Къардашов Русланнул, Сангардал школалул директорнал хъиривмур ХIажиева Ххадижатлул, Хъун дяъвилул гьурттучитуран маччасса Исяева Зузул, Чавтараева Аьйшатлул ва цайминнал.
Гьайкал дацIан дурну дур байбихьулул школалул хIаятраву, Дандамаев Ширванинал сипталий зувиваксса мурхьру бувгьу­сса Славалул аллеялий. Вания гихуннайгу шикку дансса ­давурттал сияхI чIирисса дакъар. Вайннал пикри бур шикку ккурчIа ва оьрчIру тIуркIу тIунсса майдан бансса. Мукунма умудрай бур хьхьичIва школа бивкIсса къатраву ГьунчIукьатIрал ва КIямашрал цачIусса колхозрал даэлий захIмат бивхьусса хъунмур никирая бу­сласисса, гайннал суратру, ишла дуллай бивкIсса кьай дирхьусса Тарихрал ва краеведениялул музей тIитIинссагу.
ТIайлабацIу баннав вания гихуннай дан дакIнийсса давурттавугу!

 Залму АьбдурахIманова