Гъумук хьунни Буттал кIанттул цIанийсса Хъун дяъвилий Ххувшаву ларсун 80 шинан хас бувсса «Аьпалул вахта».
Муний гьуртту хьунни Лакрал райондалул бакIчи Юсуп МахIаммадов, ДР-лул Халкьуннал Мажлисрал депутат Марат Илиясов, Афганнал дяъвилул ветерантал, хIакьину хасъсса аьралий операциялий гьуртту хъанахъисса аьралийтал, чIавааьралийтал, райондалул идарарттал зузалт.

«Аьпалул вахта» байбивхьунни Буттал кIанттул цIанийсса Хъун дяъвилия зана къавхьуминнан дацIан дурсса гьайкалдануцI тIутIив дишаврия.
Ватан дуруччаврил ххуллий жанну дуллуминнал аьпа абад баврил агьамшиврий чIурчIаву дуллай, Юсуп МахIаммадовлул кIицI лавгунни ялун нанисса никиран хъамабитан къабучIишиврий, пахрулун лайкьсса бушиврий жула билаятрал виричусса тарих.
«ХIакьину жула билаят цIунилгу талай бур нацизмращал. Мунийн бувну, жунма багьлай бур жула президентнал ва Украиннал аьрщарай хасъсса аьра­лий мурадру биттур буллалисса аьралийтурал чIарав бацIан. Ялун най дур 9-мур май, жувагу кIицI лаглан най буру Хъун дяъвилий совет агьалинал Ххувшаву ларсун 80 шин шаву.
Жула билаятрай ва кьинилул мяъна ляраличIиссар. Ва дяъвилул майданнай жанну дуллуминнал бух къалагайсса аьпа­ри, жула тарихри, жула къювур, жула вихшалар. ЧIа тIий ура гьарцаннан цIуллушиву ва дакьаву», – увкунни Юсуп МахIаммадовлул.
Марат Илиясовлул кIицI лавгунни Ххувшаврил 80 шин – ва хъанай бушиву совет агьалинал виричушиврул ва чумартшиврул тарих.
«Аьпалул Вахта» – ва Хъун дяъвилий талай, жула ватандалун дакьаву зана дурминнал аьпалул хIурматри», – увкунни ванал.
Хъирив Афганнал дяъвилул гьурттучи, ЯтIул ЦIукул ордендалул кавалер ХIусман Маммаевлул ва хасъсса аьралий операциялул гьурттучи Хайруттин Гъазиевлул кIицI лавгунни совет агьалинал виричусса тарих буруччаврил агьамшиву.
«Махъсса шиннардий гужсса пропаганда най дур Хъун дяъвилул тарих баччан буллали­сса. Западрал билаятирттал шай­сса хIарачат буллай бур фашизм духдаврил ххуллий цаламур пик­ри буслай. Ялун нанисса никиран цукунчIав къабучIиссар щялусса хавардайн вих хъанан. Дунияллий фашизм духлаган даврил хIакьсса тарих кIулну бикIаншиврул аьркинссар жула ппухълуннал дакIнин бичавурттаясса луттирду ккалан, фильмру ххал дуллан. Хъун дяъвилул тарих баччан бан ччисса билаятирттал хIарачатру ссайнчIав къабуккантIиссар му тарихрая ялун нанисса никиран куртIну кIулну бухьурча», – увкунни ХIусман Маммаевлул.
Ахирданий митинграйн бавтIминнал Хъун дяъвилий ливтIуми дакIнин бивчунни ца минутIрайсса пахъ багьаврийну.
Райондалул имамтурал хъунама ХIабиб Батталовлул дяъвилий ливтIуцириннал рухIирдая бувккунни алхIам.
Гъумучиял ОьрчIал магьирлугърал школалул тарбиялувтурал дурккунни Ххувшаврин ва аьралий темалун хас дурсса назмурду, увкунни балайрду.