Инишиял шяравалу дур Гъумучиял шяраваллия 12 километралул архну, Къимизу зунттул ухнилу, Лакралгу, Ккуллалгу, Ахъушиялгу районнал дазуй.
Дяъвилул шиннардий Ватан дуруччин фронтрайн Инишату лавгссар 24 адамина, дяъвилия зана хьуссар 15 инсан.
Инишиял инсантал чялишну гьуртту хьуссар захIматрал фронтрайгу, дихлай бивкIссар танкардайн дайгьузанну хьунсса ханнакьру ва кьакьарду.
ЗахIматрал фронтрайн тIайла буккан сакин бувну бивкIссар бригада, мунил бригадирну ивтун ивкIссар иниширичу Кьасимов ЦIаххуй. Му бригадалуву бивкIссар Щихщаева Аминат, Макьсудов АьбдурахIим, МахIаммадова ПатIима, ХIажиев Имран, Сулайманова Гьидаят, Шахшаева ХIурия, Кьасимова Бича ва цаймигу.
Жул шяравучутал Сулайманов Жяъпар, ХIажиев Исуп, Саруев ХIажи, Кьасимов МахIаммад ва Исяев МахIаммад дяъвилул шиннардий захIмат буллай бивкIссар Саратовуллал ва Энгельсуллал дяъвилул заводирттай, жула аьралийтал ярагъуннил ва техникалул щаллу буллай.
Арамтал фронтирттай талатисса чIумал шяраваллил хъаннил сакин буллай бригадартту, зий бивкIссар 1,5 – 2 нормарду бартбигьлай. Виртталну зий бивкIссар тай шиннардий колхозравугу, ичIувагу Аьлиева Жари, ХIажиева ПатIимат, МахIаммадова ХIулла, Ибрагьимова ПатIимат, Щихщаева Халун, Буттаева Качи, МахIаммадова Жамисат, Кьасимова Сиянат, МахIаммадова ПатIимат, Аьлиева Асият, Макьсудова Хамис, МахIаммадова ХIабибат.
ОьрчIал обороналул фронтран салкьи буллай бивкIссар хъуруннава къалмул чIаллу, даруврал уртту, хъанакI. Душварал щащайсса диркIссар гъилисса катIри ва жуларду.
ЗахIматрал фронтрай ва колхозраву зий бивкIсса Инишиял шяравасса 16 инсаннан дуллуссар медальлу «За доблестный труд в Великой Отечественной войне 1941-1945 г.г.».
Дяъвилий фашистътуращал талай бивкIссар Инишиял чиваркI: Исмяиллул арс Аьбдулхаликь Аьлиев, увну ур1916 шинал.
Аьралуннавун увцуну ивкIссар 1937 шинал ноябрьданий. Къуллугъ буллай ивкIссар Белоруссиянал 143-мур танкардал полкраву. 1941 шинал увцуну ивкIссар Георгий Жуковлул каялувшиврийсса аьралуннал 70-мур танкардал бригадалул 262-мур роталувун. Аьбдулхаликь Аьлиев ивтун ивкIссар 70-мур танкардал бригадалул политрукну, яла танкардал армиялул батальондалул командирну. Аьлиев подполковникнал чиндалуву ивссар Берлиннайн, ванан дуллуссар Суворовлул цIанийсса орден. Аьбдулхаликь Аьлиевлун дуллуну дур мукунна «Орден Красного Знамени», «Орден Красной Звезды», «За оборону Москвы», «За взятие Берлина», «За победу над Германией в Великой Отечественной войне 1941-1945гг», «За боевые заслуги» медальлу, «Орден Красной звезды» (кIилчингу), «За освобождение Варшавы» медаль.
Аьлиев Загьиди Аьлил арс увну ур 1905 шинал, 1942 шинал Хъун дяъвилий ятIа-тIар бакъа бат хьуну ур.
Аьлиев Ися увну ур 1896 шинал,1941 шинал дяъвилий ятIа-тIар бакъа бат хьуну ур.
Аьлиев МахIад Исмяиллул арс увну ур 1922 шинал. 1940 шинал увцуну ур аьралуннавун,1942 шинал къуртал бувну бур Ульяновскаллал летчиктурал училище, лехлай ивкIун ур У-2 самолетрай. Дяъвилул шиннардий га диркIссар хьхьунил бомбардировщик. Дяъвилий МахIад 360-ла гьаз хьуну ур гьаваллавун цала самолетрай, командиртурал ялунбихьурду бартбигьлай.
МахIад Аьлиевлун дуллуну дур «Орден Красной Знамени» ва « Орден Красной Звезды», «За оборону Сталинграда», «За взятие Будапешта», «За взятие Вены», «За освобождение Белграда», «За победу над Германией в Великой Отечественной войне 1941-1945г.г.» медальлу, «Орден Красной Звезды».
Амиров Апанни Амирдул арс увну ур 1908 шинал. Аьралуннавун увцуну ур 1941 шинал мартрай, дяъвилий гьуртту хъанай айивхьуну ур гара шинал сентябрьданий Саратов шагьрулий. 1942 шинал февральданий ятIа-тIар бакъа бат хьуну ур.
Аттаев Наби Аттайл арс увну ур 1915 шинал. 1941 шинал шяраваллил цаймигу чиваркIуннащал архIал хушрай лавгун ур фронтрайн. Гьуртту хъанай ивкIун ур Ккавкказуллахлусса талатавурттаву. 1942 шинал ахирданий миннал часть тIайла дурккун диркIссар Сталинград шагьрулучIан. Тиккусса талатавриву Набинал канийн кIусса щаву дирну дур, амма га талайна ивкIун ур, цаппара хIаллава га кIулшилия лавгун ур. Цайна цува увкIун ур госпитальданий, га чIумал хIисав хьуну дур цалла киямур ка дакъасса – га кьукьин багьну бур. Наби лайкь хьуну ур «За боевые заслуги» ва «За оборону Сталинграда» медальлан.
Буттаев НухI увну ур 1897 шинал. Аьралуннавун увцуну ур 1942 шинал мартрай, 1943 шинал шинал июльданий ятIа-тIар бакъа бат хьуну ур.
Буттаев Оьмари увну ур 1905 шинал. Аьрайн увцуну ур1942 шинал мартрай, 1942 шинал августрай ятIа-тIар бакъа бат хьуну ур.
ХIажиев Тажуттин Юсуплул арс увну ур 1915 шинал. Хъун дяъвилул шиннардий талай ивкIун ур 169-мур танкардал бригадалуву Сталинградрая тIайла хьуну Харьковрайн иянцIа. 1943 шинал мартрай ивкIуну ур, увччуну ур Харьковуллал областьрай, Чугуевуллал райондалий, Зарожное тIисса шяраву.
ХIажиев МахIаммад ХIажинал арс увну ур 1917 шинал. 1942 шинал мартрай увцуну ур аьралуннавун, 38-мур луртандалул битултрал дивизиялувун.1942 шинал апрельданий ккалли увну ур ятIа-тIар бакъа бат хьуману, дяъви къуртал хъуну махъ цаппара кIанттурдай ляркъусса чичрурдал буслай бур МахIаммад ХIажиев Армавирдай увччуну ушиву.
ХIасанов ТIухIчи аьралуннавун увцуну ур 1941 шинал. Дяъвилия зана хьуну ур инвалидну. Тамансса шиннардий зий ивкIун ур колхозраву, яла – Инишиял шяраваллил советрал председательну.
МахIаммадов Багьавуттин МахIаммадлул арс увну ур 1918 шинал.
Шяраваллил чиваркIуннал бусаврийну, аьралуннаву къуллугъ буллан Багьавуттин увцуну ур 1938 шинал. Аьралий училище къуртал бувну махъ дяъви байбишин хьхьичI хIаписарнал чиндалуву къуллугъ буллай ивкIун ур Польшанал дазуй. Дяъвилул чIумал Багьавуттин ятIа-тIар бакъа бат хьуну ур.
МахIаммадов Бадруттин МахIаммадлул арс увну ур 1911 шинал. Фронтрайн лавгун ур 1941 шинал. Гьуртту хьуну ур Сталинградуллал талатавривух, тикку щаву дирну, итаавкьуну ур шавай.
МахIаммадов ХIажибаг увну ур 1910 шинал. Аьрайн увцуну ур дяъви байбивхьусса ппурттуву, 1944 шинал ноябрьданий ятIа-тIар бакъа бат хьуну ур.
МахIаммадов ХIасанбаг увну ур 1910 шинал. Буттал КIанттул цIанийсса Хъун дяъви байбивхьусса чIумал увцуну ур аьрайн 213-мур битултрал дивизиялувун. Дяъвилул ххуллу байбивхьуну бур Белгородрая Харьковрайн иянцIа. Яла Кировградуллал областьрай Лес Плоский тIисса шяравусса талатавриву 1943 шинал декабрьданий ивкIуну ур.
МахIаммадов Ибрагьим ТIагьирдул арс увну ур 1915 шинал. Дяъви байбивхьусса чIумал увцуну ур аьрайн, кьамул увну ур кьюлтIсса аьралуннавун (секретные войска). Ибрагьимлул аьрай ларсъсса наградартту кьюлтI дурну дусса дур, ванал къабусайсса бия цала фронтрайсса оьрмулия, наградарттая. Ярглийсса ца спецоперациялий Ибрагьимлуйн дирну дия 9 ккуллаллул щавурду, увцуну ия госпитальданийн, тичча тIайла увккуну ия шавай.
Амма ца зат дакIний ливчIун бия Ибрагьимлул дяъвилул оьрмулуву хьуну бивкIсса иширттавату ганал маччанан: 1943 шинал Тегераннай (Иран) хьусса конференциялий Ибрагьим Тегераннайн лавгун ивкIун ур И.В. Сталиннул къаралчину.
Макьсудов Макьсуд Аьбдуразакьлул арс увну ур 1919 шинал, 1940 шинал увцуну цр аьралуннавун.1942 шинал июльданий къашавай хьуну, итаавкьуну ур шавай.
Оьмаров ХIабибуллагь Оьмардул арс увну ур 1919 шинал. 1940 шинал 10 класс къуртал бувну махъ увцуну ур аьралуннавун 1942 шинал январьданий га ясир увну ур. 1945 шинал мартрай тархъан увну ур, майрал 1-нний итаавкьуну ур шавай. Дяъвилия махъ цала шяраву зий ивкIссар колхозраву.
Сяидов Аьли-Исуп Сяидлул арс увну ур 1920 шинал, школа къуртал бувну бур Гъумук. Армиялийн увцуну ур гара шинал, къуллугъ буллай ивкIун ур Саратоврай. Дяъви байбишайхту гьан увну ур фронтрайн. Дяъвилия зана хьуну ур 1946 шинал. Дяъвилий ванан дуллуну дур укунсса наградартту: медаль «За отвагу» (кIийлла), медаль «За победу над Германией в Великой Отечественной войне 1041-1945г.г», «Орден Отечественной войны 1 степени». Зий ивкIун ур учительну. Ванан дуллуну дур «РСФСР-данул лайкь хьусса учитель» тIисса цIа.
Сариев (Саруев) ХIажимурад МахIмудлул арс увну ур 1019 шинал. Дяъвилул чIумал ятIа-тIар бакъа бат хьуну ур, цаппара документирттай бусса бур 1941 шинал августрал 6-нний бат хьуссар тIий, цаппаранний тIурча, 1941 шинал сетябрьданул 6-нний.
Саруев Мурад Оьмардул арс увну ур 1919 шинал, аьралуннавун увцуну ур 1939 шинал ноябрьданий. Дяъвилий 1941 шинал ятIа-тIар бакъа бат хьуну ур.
Умаров ХIадис Умардул арс увну ур 1924 шинал. Дяъви байбивхьусса чIумал увцуну ур аьрайн. Дяъвилий ятIа-тIар бакъа бат хьуну ур.
Шихшаев Хизри увну ур 1921 шинал. Дяъви байбивхьусса чIумал увцуну ур аьрайн, 1943 шинал сентябрьданий ятIа-тIар бакъа бат хьуну ур.
Аьлил Аьлиев
