Апрель зурул 20-нний Аьрасатнаву кIицI лагайсса Донорнал кьинилуцIун дархIуну «Дагестан» РИА-лий хьунни Дагъустта­ннай донорнал суккушинна чялиш дуккан даврил хIакъиравусса пресс-конференция. Шикку гьуртту хьунни Дагъусттаннал цIуллу-сагъшиву дуруччаврил министр Ярослав Глазов, Дагъусттаннал Оьттул центрданул хъунама хIакиннал хъиривмур ­Марина Курачева, Аьра­сатнал яла жагьилма хIурматлувсса донор Кьурбан Багадзиев.

Пресс-конференция тIитIлай, ихтилат бунни Ярослав Глазовлул. Ванал кIицI лавгунни Да­гъусттаннай донортал чIяву баву мурадрайсса волонтертурал программартту чялишну зий душиву, Аьрасатнаву ттурчIал нярал донортурал чулуха Дагъусттан хьхьичI ххуттай бушиву.
Ванал бусласимунийн бувну, ларгсса шинал ттурчIал нярал донортурал федерал регистрданийн агьну ур 14 азара дагъус­ттанчу. Ванил чIалачIи буллай бур шиная шинайн ми ххишала хъанай бушиву.
Министрнал мукунма кIицI лавгунни Республикалул Оьттул службалул хьхьичI ххуттайн лавсми масъалартту: медициналул идарартту качествалул ххуй­сса ва нигьачIаву дакъасса оьттул дузал баву, донорство ­чялиш ­дуккан даву, къахьунмур хьусса чIумал ишла бансса оьттул луртан чан хьун къаритаву.
Ярослав Глазовлул бувсунни Дагъусттаннай мудан оь булай­сса 15 азаруннийн бивсса донортал бушиву.
Хъирив ихтилат бувсса Кьурбан Багадзиевлул бувсунни шанна шин ва ххишалагусса чIумул лажиндарай 61-ннийн дирсса донациялийну цува хIурматлувсса донор хьушиву, уттинин цалва 94-лийла оьтту буллушиву, ва ккал 200-ннийн диян дансса пикри бушиву. Оьтту булара тIисса оьвчаву дуллай, ванал кIицI лавгунни ца донациялул кIия-шама инсаннал оьрму ххассал бан бюхъайшиву.
Марина Курачевал бувсунни 2024-ку шинал август зурул 16-ннийсса Дагъусттаннал ХIукуматрал Постановлениялийн бувну, Оьтту бутIайсса Республикалул станциялийн «Дагъусттаннал оьттул центр» тIий бушиву.

Андриана Аьбдуллаева