Ккурккуллал жяматрал вакилтурая сакин хьусса «Алжаннавунсса ххуллу» тIисса ихIсандалул фонд тIивтIуну март зуруй ца шин хьунни.
ЧIирисса чIумул мутталий фондрал чIярусса чирилул давуртту дунни. ЧIарав бавцIунни захIматсса тагьарданувун багьсса ккурккуллал бакъассагу, тиха-шихасса кумаг аьркин багьлагьисса цайминналгу.
Уттигъанну фондрал дартIсса арцух Палестиннал, Сектор Газалул жяматран ларсъссар кIира хъунисса цистерна щинал ва бувссар биялсса кIюлаччатIру. Мунияр махъ салкьи хьусса арцу тIайла дуркссар Африканал билаятрай щинах мюхтажшиву дусса кIанай «Ккурккул» («Куркли») тIисса къуй дуккан.
«Алжаннавунсса ххуллу» фондрал ккуран ялу-ялун хъунна хъанай дур. Шивун утти бухлай бур ккурккуллащал дусшиву, хIалашиву дусса цаймигу миллатирттал агьлу. Фондрал счетрайн уттигу дичлайнма бур арцу. Махъсса ца нюжмардул дянив дартIсса къачансса арцу ишла дантIиссар Палестиннал 500 инсан дукан ан ва ттигу ца цистерна щинал ласун.
Кьамулсса цадакьа хьуннав, бувмур чирину бацIаннав.
Андриана Аьбдуллаева
