Вай гьантрай Зураб Куччаев ивтунни ДР-лул шяраваллил хозяйствалул ва сурсатирттал министрнал буржру биттур буллалиману. Мунийн багьайсса Указрай къулбас дурну дур Республикалул бакIчи Сергей Меликовлул. Уттинин Куччаев зий уссия ДР-лул шяраваллил хозяйствалул министрнал хъиривчуну.
Куччаев Зураб ХIусайннул арс увссар 1981 шинал декабрьданул 11-нний Гъумук. Дагъусттаннал шяраваллил хозяйствалул академиягу ЯтIул дипломрай къуртал бувну, зий ивкIссар Лакрал райондалийсса шяраваллил хозяйствалул экономистну.
Аьралуннаву къуллугъ бувну махъ дуклан увхссар Дагъусттаннал паччахIлугърал юридический факультетрайн. Мугу хьхьичIунну къуртал бувну, 2008 шиная 2021 шинайннин зий ивкIссар Аьрасатнал МВД-лул СКФО-лийсса хъунмур управлениялул оператив-розыскрал хъунама оперуполномоченныйну. Къуртал бувссар Краснодардайсса Аьрасатнал МВД-лул университет, Нижегородскаллал Аьрасатнал МВД-лул академия. СКФО-лийсса хъунмур управлениялий зий уссаксса чIумул мутталий лайкь хьуну ур тамансса паччахIлугърал наградарттан.
Къуртал бувну бур Пятигорскаллал экономикалул ва управлениялул институтрал аспирантура, Москавливсса Аьрасатнал МВД-лул академия. Низам дуруччай органнавусса даврия лавгун ур полициялул подполковникнал чиндалуву.
2021 шинал апрельданий ивтссар ДР-лул шяраваллил хозяйствалул ва сурсатирттал министрнал хъиривчуну. Ва къуллугърай Зураб Куччаев зий ивкIссар ризкьилул масъаларттаха. Ккаккан увссар цува аграриялул ара куртIну кIулсса пишакар ушиву. Ванал сиптардайну чулийн бувкссар республикалун лябукку бусса цIу-цIусса проектру.
ДакIнийхтуну барча тIий Зураб ХIусайновичлухь лавайсса къуллугъ, чIа тIий буру ванан шяраваллил хозяйство хьхьичIуннай даврил ххуллийсса захIматраву тIайлабацIу.
