Апрельданул 18-нний М.Горькийл цIанийсса Оьруснал театрдануву хьунни ДР-лул Халкьуннал Мажлисран 30 шин шаврин хасъсса шадлугърал мероприятие. Муний гьуртту хьунни дунияллул халкьуннал дянивсса ва Аьрасатнал парламентирттал делегацияртту, АьФ-лул Президентнал Администрациялул каялувчинал хъиривчу МахIаммадссалам МахIаммадов, Дагъусттаннал чулухасса сенатор Илияс Оьмаханов, АьФ-лул Госдумалул депутатътал, Дагъусттаннал Халкьуннал Мажлисрал циняв батIавурттал (созывов) депутатътал, политикалул ва жяматийсса ишккаккулт.

Шадлугъ дайдирхьу­нни маршрал чIунилу Аьрасат­нал ва Дагъусттаннал ттугъру залданувун буккан баврия. МахIаммадссалам Ма­хIаммадовлул дурккунни Аьра­сатнал президент Владимир Путиннул барча баву. Ваний Владимир Путин кIицI бу­ллай ур ДР-лул Халкьуннал Мажлисрал хъунмасса захIмат бивхьуну бушиву региондалул лябуккулуву.
«ХIурмат бусса дустал! Барча буллай ура зун 30 шин шаву. Ларгсса шиннардий зу агьам­сса даву дурссар законну дуккан даврил база сакин баврин хасну, мунил гьанулий бартдиргьуссар региондалий тихунмайгу жяматийсса ишру (процессы) лябуккан баврил давуртту.

Дагъусттаннал парламентрал правалул гьанурду бивхьуссар экономикалувугу, социал бутIувугу, цIуллу-сагъшиву дуруччаврил ва культуралул бутIравугу дахханашивуртту даву мурадрай.
Халкьуннал Мажлисрал лайкьсса даву дурссар бакIрачIан захIматсса кьини дурксса чIумалгу, та чIумал мунища бювхъуссар цачIун буван республикалул ялапарлувтал, захIматсса масъалартту бартбигьаву мурадрай. Ми масъалар­тту бивкIссар Дагъусттаннал ва Аьрасатнал цашиву дуруччаву, дунияллул халкьуннал дянивсса терроризмалущал талатаву дачин даву, Ухссавнил Ккавкказнаву миллатирттал дянивсса дакьаву ва аслахIшиву дуруччаву. ДакI дарцIуну ура ттинияр тихунмайгу зу зуншиврий чIявумиллатру бусса Дагъусттаннан ва жула Ватандалун хъиншивурттал цIаний. ЧIа тIий ура зун оьрмулул циняв неъматру ва цIуллушиву», – тIий бур телеграммаллий.

Республикалул бакIчи Сергей Меликовлул кIицI бу­нни Дагъусттаннал парламентрал агьамсса кIану бугьлай бушиву регион лябуккан бавриву, личIинува тарихраву хьуну диркIсса захIматсса шиннардий, миннувух «суверенитетирттал парадрал» хьхьичIалу кьукьаву ва терроризмалущал талатаву дачин даву.

Ванал мукунна кIицI дунни, Дагъусттаннал депутатътурал СВО-лул гьурттучитуран кумаг буллалисса давурттугу, миннувух – СВО-лул ветерантуран ва гьурттучитуран кумаг баврил комитет сакин бавугу. ДР-лул бакIчинал тапшур бунни парламентрал ва инсантурал мурадру буруччаврил давурттаха системалул тагьарданий зузаву.
Мероприятиялул лагрулий Сергей Меликовлул депутатътуран дуллунни паччахIлугърал наградартту.
ДР-лул Халкьуннал Мажлисрал председатель Заур Аскандаровлун дуллунни орден «За заслуги перед Республикой Дагестан». Парламентрал спикернал хъиривчутал СайгидахIмад АхIмадов ва Камил Давдиев лайкь хьунни III даражалул ДР-лул ХIурматрал ордендалун. СВО-лий гьуртту хъанахъисса депутатътуран Аьбдулла МахIаммадовлун ва Расим ХIажиевлун дуллунни «За проявленное мужество» медальлу.

Республикалул бакIчинал наградартту дуллунни 16 депутатнан. Заур Аскандаровлул Сергей Меликовлухь барчаллагь увкунни Халкьуннал Мажлисран лавайсса даражалул кьимат бищаврихлу. Халкьуннал Мажлисран хас дурсса кино ккаккан дурну махъ Заур Аскандаровлул республикалул циняв ялапарлувтурахь ва парламентраву зий бивкIминнахь барча дунни шадлугърал кьини.
«Жунма дакIнийссар, дайдихьу цукунсса диркIссарив: цалчинми заседанияртту, цалчинми бястру ва цалчин кьамул бувсса хIукмурду. Га дия жула давурттал цалчинми гьанурду бивзсса чIун», – увкунни Заур Аскандаровлул.

Мероприятиялий дурккунни Федерациялул Советрал председатель Валентина Матвиенкол, Госдумалул спикер Вячеслав Володиннул чулухасса ва ­Аьрасатнал Федерациялул президентнал Ухссавнил Ккавкказуллал федерал округрал вакил Ю.Я Чайкал чулухасса аьла-ссаламру (приветствие). Барча бавурттал махъру лавхъунни мукунма Азирбижаннал ва Донецкаллал Халкьуннал Республикарттал вакилтурал.
Шадлугъирттал ахирданий ккаккан дурунни Дагъусттаннал творчествалул яла хъинми коллективру гьурттусса концертгу.