Апрельданул 18-нний МахIачкъалалив Р. ХIамзатовлул цIанийсса Национал библиотекалуву хьунни «Межпарламентское сотрудничество: фактор развития и совершенствования законодательства, укрепления межнациональных связей» тIисса конференция. Ва хас дурну дия Дагъусттан Республикалул Халкьуннал Мажлисран 30 шин шаврин.

Мероприятиялий гьуртту хьунни Аьрасатнал Федерациялул субъектирттал делегацияр­тту, Азирбижан Республикалул Милли Мажлисрал делегация, ДР-лул Халкьуннал Мажлисрал депутатътал, Жагьилтурал парламентрал члентал.
ДР-лул Халкьуннал Мажлисрал председатель Заур Аскандаровлул бавтIминнахь аьла-ссалам бунни Дагъусттаннал бакIчи Сергей Меликовлул цIанияту. Ванал бувсунни парламентирттал дянивсса ихтилат (диалог) хъанай бушиву законодательство тамам (совершенствование) шаврил ва регионнал ва паччахIлугъирттал дянив уртакьшиву цIакь шаврил гужсса сававну (факторну).
Заур Аскандаровлул тIи­мунийну, парламентру уртакьну зузаврил щаллу ду­ллай дур законодательство лядуккан даву, цIакь дуллай дур экономикалул ва культуралул дахIавуртту. Ванал мукунма бувсунни Аьрасатнал ва Беларусьнал регионнал форумирттал хъуннасса мяъна душиву, миннул площадкарттай къулбасру дурну диркIшиву хIала-гьурттуну зузаврил хIакъиравусса документирттай.
Заур Аскандаровлул бувсунни Дагъусттаннал агьамсса кIану бугьлай бушиву Аьрасатнал экономикалул системалуву ва Заккавкказуллал, Дянивмур Азиянал ва Гъанмур Востокрал паччахIлугъру гъан шаврил экономикалул базалул потенциал хIисаврай.
Парламентрал спикернал мукунма бувсунни Ухссавнил Ккавкказуллал Парламентрал ассоциациялул лагрулий ДР-лул Халкьуннал Мажлисрал Ухссавнил Ккавкказуллал республикарттал парламентирттащалсса хIала-гьурттушивурттал хIакъираву ва АьФ-лул 14 субъектрал законодатель собраниярттащал уртакьну зузаврил хIакъиравугу.
Конференциялий рязишиврул кьутIирдай къулбасру дунни Донецкаллал Халкьуннал Республикалул ва Херсонскаллал областьрал законодатель органнащал хIала-гьурттуну зузаврил хIакъираву.
Ва ялагу, ДР-лул Халкьуннал Мажлис хIала-гьурттуну зий бур жула паччахIлугърал субъектирдал парламентирттащал, Азирбижан Республикалул Милли Мажлисращал ва Беларусь Республикалул Минскаллал областьрал Депутатътурал советращал.
«Жу дакI дарцIуну буру, парламентирттал дянивсса дахIавуртту гьарта ва цIакь хъанахъаврия кумаг хьуншиврий жула регионнал лябуккулун, агьалинал оьрмулул даража лахъ шаврин ва агьалинал дянив дусшиву ва уртакьшиву цIакь шаврин», – увкунни Заур Аскандаровлул.
Конференциялий мукунма махъру лавхъунни Ленинградуллал областьрал Законодатель Собраниялул председатель Сергей Бебениннул, Херсонска­ллал областьрал Думалул председатель Татьяна Томилинал ва Азирбижаннал Республикалул Милли Мажлисрал спикер Мусса Гасымлыл. Миннал барча ку­нни Дагъусттан Республикалул Халкьуннал Мажлисран 30 шин шаву ва хъунмасса кьимат бивщунни мунил давурттан.

ХI. Аьдилов