Апрель зурул 21-нний Москавлив «Россия» тIисса Национал центрданий байбивхьунни щалвагу Аьрасатнал муниципал форум «Малая Родина – сила России». Ва шанма гьантлийссар. Ва кьини Аьрасатнаву КIанттул хIукму цахьва бушиврул кьини духьувкун, форумрал давугу, гьамин, ва кьини дайдирхьунни.

Аьрасатнал президентнал тапшур бувну дуллалисса ва да­ккаврий гьуртту хьунни билаятрал сайки циняв регионнаясса, 40000-нния ливчусса инсантал: районнал ва шагьрурдал хъуними, федерал властьрал ва регионнал вакилтал, ишбажаранчитал, жяматийсса ишккаккулт, экспертътал. Гьуртту хьунни Лакрал ва ЦIуссалакрал районнал хъунимигу, МахIачкъала шагьрулул мэр Юсуп Умавовгу, Депутатътурал Мажлисрал хъунама Марис Илиясовгу.
«Дагъусттаннаясса 60 делегат гьуртту хъанай ур форумрай, жущал ур «Служение» премиялул финалист, Хасавюртуллал райондалиясса информатикалул учитель Амир Хириясуллаевгу.
Дагъусттаннал бакIчи Сергей Меликовлул тапшур бувну, делегациялул каялувчи ур Республикалул бакIчинал ва ХIукуматрал администрациялул хъунама МахIач Оьмаров», – чичлай ур цала Телеграм-каналданий Лакрал райондалул хъунама Юсуп МахIаммадов. Шиккува кIицI лаганна, «Служение» премия дулун форумрайн президент Владимир Путин цувагу увкIшиву.
СВО-лул ветерантурайн Путиннул «Мусил фонд» увкунни: «Укунминнайн билаят тапшур буван нигь дакъар. Вай ккаккиялун бивхьуну, оьрчIру тарбия буллан аьркинссару, вайннал цIарду кIичIирттан ва школардан дизлай. ХIакьсса элита – Ватан дуручлачимири».
Шагьрурдал, районнал ва шяраваллал хъуниминнайн хъуннасса вихшала душиврийгу чIурчIав дунни. «Ххуйсса, бюхъу-бажар бусса, аякьа дусса хъуними гьарцагу кIанай аьркинни. Муниципал даражалий хаснува. АгьалиначIан яла гъанми зу бунутIий», – увкунни президентнал.
«Форумрал гьанумур мурад – паччахIлугърал кьиматрай­сса ххазинартту гьанулун лавсун, Аьрасатнал муниципал сообщество цачIун дувавур. Владимир Путиннул цалвагу кIицI лавгунни, паччахIлугърал къуллугъ хьхьичIва-хьхьичI агьалинаха зузаву душиву», – укун тIий ур цаламур Телеграм-каналданий ЦIуссалакрал райондалул хъунама МаматIи ХIамзатов.
ПатIимат Рамазанова