ЧIумул жува лавсун най буру, неххал щин кунма, хьхьичIунмай. Аьпа ва ччаву тIурчарив ласун къашайссар я чIумуща, я не­ххаща.
Ватандалул ххуллий жан харж дурсса цума-цагу виричу – жула тарихраву пперха тIий личIантIисса яргсса цIукур, цуксса чIун чIарах дуккарчагу, цал чани тачIаввагу къалещантIисса. Гай жущала личIантIиссар гьарцагу лахIзалуву, бивгьусса ссихIираву, цIусса кьинилул хьунийн лавсъсса гьарцагу шаттираву. Гайннал виричушиву – му кьуватри жува цачIун буллалисса, жувунма гуж бутлатисса. Аьпа абадминнан хас бувсса рубрикалуву хIакьину бусанну хасъсса аьралий операциялий ватандалул мурадру буруччаврил ххуллий чувшиврий жан дуллусса ца ттигу миллатрал язисса арсная – Аьбдурашидов Казбек МахIаммадлул арсная. Цангу ва зуруй хьунтIиссия ххюцIалла шин.

Казбек дунияллийн ув­ккун ур аьраличунал кулпатраву 1975 шинал апрельданул 4-нний Турткуль тIисса УзбакIнал шагьрулий.
Тикку къуллугъ буллай ив­кIун ур ванал ппу МахIаммад, цувгу Ярославль шагьрулий Аьралий училище къуртал бувну махъ тIайла увккун. Аьралий гужирдал ветеран, дяъвилул иширттал гьурттучи, ивкIун ур УзбакIнал Верховный советрал депутатну. Лайкь хьуну ур ПаччахIлугърал наградарттан, Маршал Валентин Варенниковлул чулухасса Барчаллагьрал чагъардан.
Гъумучатусса МахIаммадлул ва Гулизардул кулпатраву Казбек хьуну ур дуниял тIитIин увксса хъуна-хъунама арс, цаха мачча-гъанминнангу чIалачIин къадиркIун дур. Совет заманнул цума-цагу оьрчIал кунна, талихIрай ларгун дур ваналмур оьрчIшивугу.
КIира шинава дунияллийн бувккун бур душ Зубайда, ванил хъирив – ялагу кIия арс: Аьбдурашид ва Мурадбаг. Хъин­сса, чIаравминнай цIими бу­сса оьрчI икIайва тIар Казбек чIивинияцIа кIулминнал.
Аьбдурашидовхъал кулпат 80-ку шиннардил ахирданий бивзун бур Дагъусттанн­айн, школагу Казбеклул къуртал бувну бур Каратиял шяраву марцI ххювардай. ЯтIул дип­ломращал Финансовый техникумгу къуртал бувну, дуклан увххун ур Дагъусттаннал паччахIлугърал университетрал финансир­ттал ва экономикалул факультетрайн.
Студентсса шинну ларгун дур тяхъану: «Студенческая весна» конкурсирттай гьуртту хъанай, КВН-далул кьюкьлуву фестивальлайн аьрххирдай занай.
АрхIал дуклай бивкIминнан Казбек дакIний ливчIун ур гьар ишираву чул бищун вихшаласса, чумартсса, дакI кьянкьасса чув-адаминашиврийгу, дакI тIайласса дус-ихтиваршиврийгу. ХьхьичIунсса ккаккиярттай университетгу къуртал бувну, тIалавсса пишакар хьурчагу, дакIмур кIункIу тIий диркIун дур аьралуннаву къуллугъ буллан.
«Казбеклул армия ккалли байва чувшиврул школалун. Гьарца каникуллу гьан дайва буттащал полигоннай. Садикрайн занай унува Калашниковлул автомат яру лавкьуну ппивгу бувну, багу-батIайва, – дакIнин бутлай бур Гулизар. – Жунгу хавар бакъа, цала хушрай лавгуна аьралий бурж лахъан. Ппу, запасрайсса подполковник, та чIумал зий уссия Республикалул военкоматрай. МахIаттал хьуну ливчIун ивкIун ур аьралуннаву къуллугъ бан нанисса жагьилтуравух арс ккавккукун.Аьралуннаву къуллугъ буллалиссаксса чIумул мутталий Казбек лайкь хьуну ур аьралий частьрал хъуниминнал чулухасса Барчаллагьрал чагъардан ва ХIурматрал грамотарттан.

Аьралий бурж лавхъун, Дагъусттаннайн зана хьуну махъ, Казбек зий айивхьуну ур цала пишалий «Электросвязь» ЗАО-лий, яла «Ингосстрах» ОСАО-лий. 2009 шинал хIасул дурну дур къатри бавриха зузисса ООО «Файда». Муния махъ зий ивкIун ур Аьрабнал ЦачIунбув Эмиратирттай туризмалул аралий. Вара шинал декабрьданий бувну бур хъатIи.
«2010 шинал декабрьданул 21-мур кьини Казбеклул оьрмулуву хьуcсар яла талихI бумур кьинину, дунияллийн бувкссар жул душ Гулизар. Казбеклун хъинну ччай бия цалчинсса душнин цала ниттил цIа дизан, – дакIнин бутлай бур Казбеклул кулпат Этери.
– 2012 шинал мартрай дуния­ллийн бувккуна жул кIилчинмур душ Асият. Казбеклун душвараха чIалачIин къадикIайва. Ххуйсса кIулшиву дулун ччай икIайва, гай гьарца чулуха итххявхсса букканшиврул.
Этерил бусаврийн бувну, Казбек хасъсса аьралий операция байбивхьусса гьантрайва пикри буллай ивкIун ур контракт чичаврил ялув. Кулпат ва гъанчу аьраттал буклан бивкIукун, Казбеклул учайва: «Аллагьнал чивчуну бухьурча, инсаннан бивкIу бухкIуллийгума буссар», – куну.
ТачIав щиячIав, ссаячIав нигьакъаусайва, Аллагьнайн таваккул бувтун ялапар хъанай ия. ДакIнил тIимур бувну, 2023 шинал октябрьданул 23-нний лавгуна хасъсса аьралий операциялий ватандалул мурадру буруччаврил ххуллий талан. Къуллугъ буллай ия Запорожскаллал областьрай стрелок-штурмовикну. Хаин къавхьуна цала хасиятрайн, ливчIуна чумартнува, дакI кьянкьанува, дуснахлу жан дулун махъаллил акъа.
Гъанминнащал связьрайн увкний, захIмат-жапалия шикаят цукунчIав къабайва, хъинмунийн хьул бивхьуну, макьу дуну икIайва, жул яхI къагъагъан. Ялунгума цува икIайва жул буруккинттарай.
Ганал махъва-махъсса махъругу душварая бия…
Дурусну шанма барз ккуру лавгун, гьантта гьантлийн багьну, 2024 шинал январьданул 23-нний Запорожскаллал областьрай Вербовое тIисса шяраву аьралий мурад биттур буллай бунува, Казбек гьурттусса талаталтрал группа биту-ххитулухьхьун биривну бия. Цайва бивхьусса аьралий бигар биттур бувну бия, амма зана хьун нясивну къалявкъуну бур.
Казбеклул жан дуллуссар ватандалул ххуллий, аьраличунал буржирайн ва цала яхIлийн тIайлашиву дурурччуну, щавурду дирсса аьралий гьалмахтал кьакъабивтун.
Аьрасатнал президент Владимир Путиннул Указрайн бувну, 2024 шинал июльданул 8-нний Аьбдурашидов Казбек МахIаммадлул арснан дуллуссар Чувшиврул орден (ивкIуну махъ).
Буссар жула дянив талаталал дакI ва гьавас бусса инсантал, тачIав нигьачIаврия ццах бакъасса, виричушиву паракьатсса оьрмулияр ххирасса. Мукунминнавасса ца ия Казбекгу.
ХIайпссия, гьай-гьай, укунсса жагьилтурал оьрмурду дяъвилул майданнай бяличIан. Мякьнува, яру хьулувун буруглайнма личIантIиссар вайннал гъанчугу.
Аьпа баннав цал!
Алжаннул ххари баннав!
Зулайхат Тахакьаева