Апрель зурул 9-нний Москавлив Европанал бусурманнал форумращал уртакьну хьунни щалвагу Аьрасатнал лагрулийсса форум «Аьрасатнал гуж – халкьуннал цашиврувур» тIисса цIанилу. Ва хас бувну бия Зумаритавал байрандалун ва Ххувшаврил 80 шинал юбилейран.
Ваний гьуртту хьуминнавух бия Аьрасатнавусса Палестиннал вакил Абдель Хафиз Нофаль, Аьрасатнал Бусурманнал рувхIаний управлениялул хъунаманал цалчинма хъиривчу Дамир Мухеттинов, Ухссавнил АьсатIиннал муфти ХIажимурад Гацалов, Госдумалул депутатътал Адам Делимханов, Жамалуттин ХIасанов, Дагъусттаннал Халкьуннал Мажлисрал депутат Шамил Оьмаров ва цаймигу бусравсса инсантал.
Оьвкуну бия форумрайн Аьрасатнал СВО-лул цалчинма Виричу НурмахIаммад ХIажимахIаммадовлул ниттийн Сапижат Мазаевайнгу. Ванил дурккуна НурмахIаммадлул чирчусса назму, залданувуцириннайн бюххансса асар биян бувсса.
«Форумрай ихтилатру буллалисса чIявуми кIицI лаглай бия жула ппухълуннал Аьрасатнал халкьуннал цашиврул цIакьсса гьану бивзшиву ва гьамин му цашиврул Ххувшаву ласунгу кабавкьушиву.
Европанал бусурманнал форумрал хъунама Аьбдул-ВахIид Ниязовлул, Дамир Мухеттиновлул чIурчIав дурна щалва Запад Аьрасатнайн данди бувксса ва ппурттувугу ххув хьунтIишиврий Аьрасатнал агьалинал цашиву. Форумрал гьанумур мурадгу дакьаврил илчитал ва Аьрасатнал халкьуннал цашиврул чапартал хьун оьвтIисса бия». Динну ва миллатру личIи къабуллай цачIунмай хьун, Аьрасат аргъ дусса, цIакьсса билаят хьуну къаччиминнайн данди буккан», – увкунни Сапижат Мазаевал.
ПатIимат Рамазанова
