Аьрасатнал Виричу Дмитрий Серковлул цIанийсса Шушиннал школалий Дагъусттаннал бакIчинал администрациялул вакилтал хьунабавкьунни дуклаки оьрчIащал.
Ялун нанисса никирал оьрчIащал ихтилат бан бувкIун бия Дагъусттаннал бакIчинал кумагчи АхIмад Аьбдуразакьов, Жяматийсса палаталул член, «Боевое братство» тIисса организациялул региондалул отделениялул сопредседатель МахIаммадрасул Сулайманов, ЦIуссалакрал райондалул бакIчинал хъиривчу Амир Султанов, ЦIуссалакрал райондалул КIулшиву дулаврил управлениялул вакилтал.
ОьрчIащал гъалгъа баннин хъамаллуран ккаккан бунни школа, Шушиннал шяравасса хасъсса аьралий операциялул гьурттучитурал ва 1999-ку шинал сентябрь зуруйсса дяъвилул иширттал вирттаврал стендру. Делегатътал махIаттал бунни школалий дурсса хъуннасса даврил, дуклаки оьрчIал Ватандалул цIаний жанну дуллуминнал аьпа буруччаву мурадрай бувсса хIарачатрал.
Школа ххал бувну махъ хъамал бувкIунни цахва ялугьлагьисса хъуними классирттал оьрчIачIан. Хьунабакьаву дайдирхьунни жанну дуллуминнал аьпалун баян бувсса минутIрайсса пахъ багьаврийну.
Дуклаки оьрчIащалсса ихтилатраву АхIмад Аьбдуразакьовлул кIицI лавгунни ялун нанисса никирал жула тарих буруччин ва Ватандалул цIаний жанну дуллуминнал къучагъшиву дакIний ритан аьркиншиву, хIакьинусса жагьилтуран эбратну дикIан аьркиншиву буттахъал чувшиву, миннал кIунттихь бушиву Дагъусттанналгу, Аьрасатналгу бучIантIимур.
МахIаммадрасул Сулаймановлул дакIнин бивчунни 1999-ку шиналсса дяъвилул ишру. Бувсунни та ппурттуву Ватан дуручлай бивкIсса дагъусттанлувтурал чувшиврия. Ванал оьвчаву дунни дуклаки оьрчIайн республикалулгу, райондалулгу жяматийсса оьрмулуву чялишсса гьурттушинна дан, билаятрал мурадру буруччин хIадурну бикIан.
Амир Султановлул кIицI лавгунни жагьилтал Ватан ххирану тарбия баву мурадрай школалий хъуннасса даву дуллай бушиву, райондалул администрациялул уттиния тихунмайгу ва давриву школардан кабакьу буллантIишиву. Ванал оьвчаву дунни дуклаки оьрчIайн, цала райондалулгу, Дагъусттанналгу цIа Аьрасатнал даражалий бюхттул дан, личIи-личIисса конкурсирттай ва олимпиадарттай гьуртту хьияра куну. ОьрчIал цIухху-бусу бунни хъамаллурахь райондалул даража гьаз баврил, жагьилсса пишакартуран кабакьу баврил ва цаймигу масъаларттал хIакъираву. ОьрчIал цинявппагу суаллан балжисса жавабругу дуллуну, хъамаллурал чIа увкунни дуккавриву тIайлабацIу, ххуйсса ккаккияртту. Махъ буллунни иш багьний чIарав бацIан.
Ихтилатру къуртал хьуну махъ цинявпа лавгунни школалул хIаятраву дацIан дурсса Дмитрий Серковлул гьайкалдануцI тIутIив дишин.
Хъирив дуклаки оьрчIал тIитIин бунни Ххувшаврил хъунмасса ттугъ.
