Ларгсса хамискьини Лакрал райондалий хьунни депутатътурал сессия. Муний гьуртту хьунни райондалул бакIчи Юсуп МахIаммадов, ванал хъиривчутал, райондалул собраниялул депутатътал, идарарттал каялувчитал, шяраваллал бакIчитал.

Сессия байбишин хьхьичI Юсуп МахIаммадовлул Чувшиврул орден дуллунни гъинттул хасъсса аьралий операциялий чувшиврий жан дуллусса, Кьубиял шяравасса Раджабов Тимур Залимханнул арснал гъанчунахьхьун. Муния махъ гьарта-гьарзану бувсунни 2024-ку шинал дурсса давурттая ва 2025-ку шинал хьхьичI бивхьусса ма­съаларттая.

Райондалул администрациялул хьхьичIххуттай бур хасъсса аьралий операциялий ватандалул ххуллий жанну дуллуми­ннал ва хIакьинугу тикку талатиминнал кулпатирттал чIарав бацIаву. Хъирив бувсунни ми­ллатрал проектру щурущи даврил ххуллийсса мероприятиярттая: экономика, инфраструктура ва социал ара хьхьичIуннай даврил ххуллийсса давурттая.

Ларгсса шинал лажиндарай дурсса давурттаву Юсуп МахIаммадовлул кIицI ларгу­нни райондалийн тIабиаьтрал газ буцаврил ялув дан бювхъу­сса давуртту. ХIакьинунин щаллу хьуну дур проектрал давурттугу, Гъумукун магистрал газопровод дуцинсса рязишинна дуллуну. ХIадур бувну бусса бур му магистрал дуцинсса кIанттурду.

Зулайхат Тахакьаева