Мартрал 27-нний Лакрал райондалул Магьирлугърал къатраву хьунни мубараксса Рамазан зурун хас бувсса мажлис. Муния махъ тIурча, райондалул бакIчи Юсуп МахIаммадовлул ва ДР-лул Халкьуннал Мажлисрал депутат Марат Илиясовлул цачIу сакин дурсса, аьдатравун дагьсса райондалул ифтар.
ДР-лул Муфтиятрал Кьиблалул округрайсса вакил МухIаммад Майрановлул, райондалул Имамтурал советрал хъунама ХIабиб Батталовлул, шяраваллал мизитирттал имамтурал агьалинахь, ялун нанисса Зумаритавал байрангу барча дурну, бувсунни мубараксса Рамазан зурул ва зумадугьаврил мюнпатрая, зурул лажиндарай бувсса цадакьарттал ва хъин-хъинсса давурттал барачатрая, цачIусса ифтардал агьалинал дянивсса цашиву ва миннал дакIурдивусса рувхIанийшиву цIакь дуллалаврия.
Дюххансса нашидиртталгу дакIнин бутлай бия, цуксса агьамссарив Аллагьу Тааьланахсса, КIаная ливксса идавстурахсса ва малаиктурахсса ччаву, бусурман умматрал дянивсса цашиву ва уссушиву.
Юсуп МахIаммадовлул, агьали барча буллай, кIицI ларгунни мубараксса Рамазан зуруй бувсса хъинбаларттал, мюхтажнан цIимилул ка тIитIаврил агьамшиву.
«Рамазан зуруй цачIу дуллалисса гьарцагу аьдат-эбадатрал исват буллалиссар агьалинал цашивруву, куннал кунначIансса хIурматраву, чIарав бацIавриву бушиву жула гуж.
Кьамул даннав Аллагьнал ва зурул лажиндарай зу дурцири аьдат-эбадатру – таравих чакру, дургьуцири зумарду, бувцири цадакьартту, бивчуцири закятру, баяннав КIанан зу дуллай бивкIцири дуаьрду! ЦIакь хьуннав зул дакIурдиву иман, дунияллий дакьаву! ЦIуллушиву дулуннав зухьхьунгу, зул дакIурдин ххираминнахьхьунгу ялунчIингу вава куццуй бюхттулсса даражалий хьунагубавкьуну, тIайлагу буккан жунма ххирасса Рамазан барз», – увкунни Юсуп МахIаммадовлул.
Барчаллагь увкунни ХIабиб Батталовлухь ва шяраваллал имамтурахь райондалий дуллалисса рувхIанийсса давурттахлу, агьали цачIун баврил ххуллийсса аькьилсса насихIатирттахлу ва дуаьрдахлу.
Марат Илиясовлул кIицI ларгунни жяматрал цашиву цIакь даврил ххуллийсса рувхIанийсса давурттал агьамшиву. Агьали барчагу бувну, чIа увкунни нахIу-хIалимшиву ва дакьаву.
Мажлисрай дурххунни райондалул рувхIанийсса идаралул чулухасса бахшишру.
Дипломру ва бахшишру дуллунни Ахттиял АьбдурахIман-хIажинал «Диндалул гьанурду» тIисса луттираясса конкурсрай ххув хьуминнан.
Цара-цасса дия ва мажлисрайн бувкIминнал зумату баллалисса дуаь – ччясса мутталий СВО-гу къуртал хьуну, жула чиваркI сагъ-саламатну цала кулпатирттал ялун зана хьуннав тIисса.
Мажлисрал яла бусравми хъамалгу ва базилухь бия хасъсса аьралий операциялий жанну дуллуминнал ва хIакьинугу тикку ватандалул мурадру буруччаврил ххуллий талатисса аьралитурал кулпатру. Вайннал зума итадакьинсса ссупра тIивтIуну бия Магьирлугърал къатраву. Гьарцаннахьхьун буллуна Юсуп МахIаммадовлул ва Марат Илиясовлул чулухасса ссайгъатругу. «Барчаллагь зун хъунмасса, дакIурдивусса дард-хажалатирттах къабурувгун, ва мажлисрайн бучIаврихлу. Зул чумартшиврул ва кьянкьашиврул жувунгу гьавас бутлай бур. Жу цинявппа дуаьрдай буру, зул арсру, ласру, уссурвал ччясса мутталий зана хьуннав тIий. Жу даингу зул чIарав буссару», – увкунни Юсуп МахIаммадовлул. Райондалул агьалинал зума итадакьинсса ссупра тIивтIуну бия Гъумучиял Хъунмизитраву.
Зулайхат Тахакьаева
