Хъинбала-хъиншивурттал, Заннал цIимилул, узданшиврул бувцIусса, бусурманнан яла ххирамур Рамазан барз лайкьсса даражалий тIайла буккансса каши-кьудрат дуллунни гьашинугу жухьхьуннасса Заннал. Зумаритавал байрандалийнсса ттулмур аьрххи хьунни буттал шяравун, Хъусрахьхьун.
Шяравун бивсса чIумалгу чIалай бия Рамазан зурул бияла хъунмасса бушиву. Уттара дурккун дия щар, лавхъун бия чирахъру ужагъирттай, цIу-пуркIу бивчуну, хъамал кьамул бан хIадурну бия цинявппа. Инсантал бия ва буниялагусса ссихIирданул барз къуртал къашайссания тIий.
Гьашинугу ттула буттал шяравун бучIансса каши-кьудрат дулаврия щукрулий бура Хъунасса Заннайн.
Лайкьсса даражалий эбадат дуллай, зумарду дугьлай, дуаьрду дуллай, Кьуръан ккалай, ххуймур-хъинмур буллай тIайла бувккунни Рамазан барз жул шяравугу.
Ттул оьрмулуву, ттун кIулссаксса, мукьра-ххюра хIатталу дур Хъусращиял шяраву. ХIатталлийн бивну, кьулгьу-Кьуръан бувккуну махъ, бивкIу-буккурду хьусса ужагъирттайн, бугьараминначIан занай байбивхьуна.
Мизитраву байрандалул чаклия махъ бунни щарнил жяматрансса пулав. Дунни диндалул кIулшивуртту аьч дуллалисса оьрчIал дянивсса конкурс. ТIайласса жавабру дуллуминнайх дарчIунни личIи-личIисса бахшишру.
Имара Саидова
