ХIакьину жуна чIявуссаннан кIулсса техникалул элмурдал доктор, профессор АьбдурахIман Халилов ванал арсри.
Исмяил Халиловлун хас бувсса вай шеърилул ххаругу на чичав ванал цалла цIанияту.
Халиллул арс Исмяил Халилов, 1945 шинал Обкомрал тIайла увккун, зий ивкIссар ЦIуссалакрал райондалий культуралул отделданул хъунаману, яла – райкомрал 2-ма секретарьну. 1952 шинал му ивтссар цалчинма секретарьну. Му ия Хъун дяъвилул гьурттучи, авкьатсса чурхгу бусса, орденоносец, лахъсса, ккаккангу ххуйсса инсан, чурххаха лархьхьусса дакIгу дусса. 1943 шинал Новороссийск шагьру тархъан буллалийни хьун дурсса къучагъшиврухлу Совет Союзрал Виричунал цIа дулун ккаккан увну ивкIссар тIий бикIайва. Мунал дия полковникнал чин.
***
Новороссийск шагьру ххассал бавриву
Биялсса хIарачат бувссия нагу:
Цикссагу фашистнал битавсса саллатI
На «бюкьан» бувссия ЛухIи хьхьиривун.
Гайннавату сагъну ливчIсса ца фашист,
Ттуйн мабитара тIий, вев-шев тIий ия:
ЛухIи лархсса нину ттул хьхьичI дарцIуна,
Ва макI дур увкуну, автомат къур бав…
Ефреторнал кружка спиртрал дурцIуна,
ЧIаравсса дустурал къалиян лавхъна.
Хъуннасса орденгу хъазамрайн ларчIун,
«Халилов молодец» комбригнал куна.
Оьруснал саллатIнал гармун бивщуна,
Цинявппагу ххявххун, къавтIун бивкIуна:
На лавай гьаз увну, машалли увнав,
Савлугъран бюхттулну «гьуррагу» куна.
Трафейный «Вилисрай», паччахIнал кунма,
Та Берлин шагьрулийх на гайз бувссия.
Лаккунай цаппара «ххуйсса махъругу»
Та Рейхстаграл чIирай на чивчуссия…
Дяъвилияр махъгу махъун къаагьра,
Исполком, райкомру жагьилна ккавкри.
Зузи дуллай ивкIра колхоз-совхозру,
Къуллугъ буллай ивкIра «цIусса» лакраха.
Буттахъал тухумгу жард чин къабитав,
ЦIа ядансса арсру чивун буккан бав.
Къуллугъчитал цая хьуну бунугу,
Жяматрая арх хьун на ми къабитав.
Бюхъай ттун алжангу нясив къабуван,
Аьрай на ливтIусса душмантурахлу.
Уттиния тинмай ци бучIарчагу,
Буттал улча – Ватан на ххассал дурссар.
Ттул гьаттай бищара аьдатсса чару,
Мунийгу чичара аьпалул махъру:
«ЦIувкIрачу Исмяил, ина увхссара,
Шанашу, шанашу, тти игьалагу».
ТтурчIиял Зайнулла
