Капитал ремонтрал фондрал хъунаманал хъиривчу Заур Бахмудовлул, кIантту-кIанттурдайн лавгун, кьамул бунни агьали. Къизлардай коммунал масъаларттал хIакъираву къуллугъчинайн бувккунни Сорок лет Дагестана кIичIиравусса 18-ми, Октябрьская кIичIиравусса 2-ми, М. ХIажиевлул кIичIиравусса 1а, Махачкалинская кIичIиравусса 6-ми ва Набережнаялийсса 42/1, 1а къатраву ялапар хъанахъисса агьали. ЧIявуми квартирардал заллухъруннал къайгъурду къатрал магъив дакьин даврил хIакъиравусса бия, гайми аьрзирай бия щинал системарду дух хьуну душиврия.
Цинявппагу аьрзирай бувкIминнахьхьун къуллугъчинал балжисса жавабру дуллунни.
Мероприятиялул лагрулий Заур Бахмудовлул ТСЖ-лул ва УК-лул каялувчитуращал ххал бивгьунни къатрал мониторинграл файллу щаллу баврил, взносирдахсса буржирдал, къатри гьануцIакул ремонт дан хIадур даврил, къатраву ялапар хъанахъиминнайн баян баврил масъалартту.
Къизлардайсса къатри ряхцIаллагу, ххишалагу шинну хьусса дур.
2015-2024-ку шиннардий Региондалул программа щаллу даврил лагрулий гьануцIакул дакьин дурну дур чIявусса квартирарду бусса 44-райра къатри. 2025-ку шинал дакьин дантIий дур 174 инсан ялапар хъанахъисса 8-райра къатри (402 азарда кв.м.). Ваних къабурувгун, Къизлардай капремонтрахсса взносирдал бурж аьмну 116 миллиондалия ливчусса бур. Взносру дулаву 52 % личлай дакъар.
Росреестрданий бакъар чIявусса квартирарду бусса къатравусса 269 заллухъруннаясса сведение. Миннайсса бурж 8 миллиондалия ливчусса бур.
Южно-Сухокумскалий Заур Бахмудовлул кьамул унни приемрайн увкIсса мукьагу инсан. Вайннал аьрза бия къатрал лувчIиннив щин дацIлацIаврийн, тIааьн дакъасса кьункьайн ва хъатрулийн, подъездирттавусса чIакрайн багьайсса.
Заур Бахмудовлул бувсунни 2025-ку шинал кутIасса чIумуй план щаллу даврил программалул лагрулий щинал система дакьин дансса пикри бушиву.
Мероприятие къуртал хьуну махъ агьалинайх бавчIунни информациялул буклетру, кIицI лавгунни капремонтрахсса взносру чIумуй дулун аьркиншиву.
Андриана Аьбдуллаева
