Зума дугьаврил гьантрай Краснодардал крайрай Славянск-на -Кубани шагьрулий ялапар хъанахъисса Шушиннал шяравасса Фрунзе Айдиевлул цала чулуха Шушиннал, Аьхъардал ва ЦIуссачIурттащиял жяматрайх бавчIунни иникIмалул чуваллу.
Чирилул ххуллийсса давуртту чансса дакъар ванал дурсса. Фрунзен къаххирар цала дуллалисса давурттая буслайгу.
Шиккува кIицI лаган, ванал гьарица шинал, Зумаритавал байрандалун хасну, райондалул жяматран цала чулухасса кумаг байссар. Ларгсса шиналгу, ванал жяматрайх бавчIуна ппиринжрал ва иникIмалул чуваллу.
Укунсса дугърисса иширттал исват бувай жула дянив сахаватлувсса, иш багьний, куннал чIарав кув бацIан ва мюхтажнахьхьун ка тIитIин хIадурсса инсантал чан бакъашиву. Хаснува цIанасса чIумал хъиннува чIяву хъанай бур ихIсандалул давурттавух гьуртту хьун чялиш буклакисса чумартлувтал.
Имара Саидова
