Буттал кIанугу, щарнил агьлугу ххираминнан, щак бакъа, Ватангу ххирасса дикIай. Украиннал аьрщарай хасъсса аьралий операция байбивхьусса ппурттуву жула жагьилтурал исват бунни цивппа хIакьсса патриотътал бушиву.

Аьрасатнал президент ­В. Путиннул билаятрал мура­дру буручча­врил цIаний хасъсса аьралий операция баян бай­хту, ЦIуссалакрал райондалия чIявусса жагьилтал лавгунни ­Аьрасатнал мюхчаншиву дуручлан. ХIакьинусса кьинигу аьралитал лайкьну бартбигьлай бур цайва бивхьусса буржру. ЦIуссалакрал райондалийсса ЦIуссалакрал шяравасса МахIаммадлул арс Мурад Юсуповгу миннавасса ца ур.
Ватандалул мурадру хьхьичI ххуттай бивхьусса жагьил, хушрай контрактгу чирчуну, лавгун ур аьралий бурж биттур буван. Луганскалий полигондалий дуллай ивкIун ур аьралий хIадуршиннарду. Учебный ­курс къуртал шайхту, тIайла увккун ур Белгородрал областьрайсса аьралитурал кьюкьлувун.
ХIакьинусса кьини Мурад, хьхьичI ххуттай талай, лайкьсса даражалий бартбигьлай ур аьра­лий бурж. ЧIярумур чIумал, окопирттава буккан нигьачIаву дуну, дукан-хIачIанмур дакъа, аьралитуращалсса дахIаву дакъа личIайсса бур вай. ЯхI-къирият ялтту дурксса, дакI тIайласса аьралий гьалмахтал, куннал чIарав кув бацIлай, кьянкьану ­щаллу буллай бур Ватандалул мурадру. Хасъсса аьралий операциялий дурсса къучагъшивурттахлу ва лайкь хьуну ур личIи-личIисса паччахIлугърал наградарттан.
Мурад увну ур захIматрал кьадру кIулсса, чIявусса оьрчIру бусса кулпатраву. Мюрщину бунува нитти-буттан кумаг буллай аьдат хьуну бур. ОьрчIаву цIакьсса тарбиялул гьану бизавриву хъунмасса бутIа ­бивхьуну бур вайннал ниттил ­Муслиматлул. ОьрчIан мудангу ­эбратну хъанахъиссар нитти-буттал багьу-бизу. Мурадлунгу эбратну хьуну бур бусравну оьрму бутлатисса цала нину-ппу. Вайннал кунма, ваналмур захIматрал ххуллугу байбивхьуну бур Казбековлул цIанийсса колхозрава. Армиялий къуллугъ бувну махъ, зана хьуну ур цува зий ивкIсса колхозравун.
Мурад кулпатравугу, дустуращалгу, чIаххув-чIарахнащалгу авкьусса, иш багьний чIарав ацIан хIадурсса ушиврийн ­бувнугу ххирасса ур цинявннан.Укун бусравсса хасиятру ­ду­сса уну тIий шамийла ув­чIуну ур ва Шяраваллил ­Мажлисрал ­депутатну. ­Мурад­лул ­дакIний­хтуну цIакь дунни ­агьалинал ­чулухасса ­вихшала.
Билаятрай пандемиялул ­тагьар хIасул хьусса ппурттувугу ванал цува унгу-унгусса патриот ушиву ккаккан бувссар. Инсантурай кьатIув буккан къадагъа дирхьусса чIумал, медикаментру, дуки-хIачIия диян дуллай, «анаварсса кумаграл» машина бучIаннин къашайшалт азарханалийн биян буллай ­уссия. Цала оьрмулун хъуннасса нигьачIаву дунугу, шяраваллил жяматран кумаг бансса чаранну лякъай­ссия ванал. Та ппурттуву Мурад лайкь хьуссия ­ДР-лул бакIчи Сергей ­Меликовлул чулухасса Барчаллагьрал ­чагъарданун.
Цала буржгу лайкьну ­барт­­бивгьуну, сагъ-саламатну за­на хьуннав цинявппагу жула ­арсру, уссурвал, ппухълу.
Имара Саидова