Март зурул 19-нний, централ телевидениялий, Цалчинмур кана­лданий цIусса хаварду бусласисса передачалий Москавуллал модалул нюжмарданиясса сюжет дайдирхьуна Дагъусттаннал дизайнер Майя Мамаевал «Бузма» коллекциялия ва ванищалсса кутIасса ихтилатрая. Ва иширавагума чIалай бия хьхьичI кьини Манежрайсса подиумрай «Бузмалуй» ябавцIушиву, модалул дунияллий цIакь хьушиву лакку «Бузма».

Вай гьантрай щалла дунияллул модардал изданиярттал мяйжаннугу къулагъас дия Москавливсса модалул выставкалух. Зувиннийн бивсса регионнаясса 180 дизайнернал давурттай тамаша буван биялсса агьлугу бавтIун бия. Индонезиянавасса, Китайнавасса, Турциянавасса ва цаймигу кьатIаллил билаятирттаясса дизайнертурал коллекциярттугу бия. Ва укунсса модалул хьхьириву лакку «Бузмалуй» ябацIаву жунма цинявннан пахрулунсса ишри. Ттун найдунура ххуй дирзуна Майял цилла брендран «Бузма» тIисса лакку цIа дизаву. Бузмарду жулла бавахъал хъатIайн, хъиншивурттайн лаххайсса лаххия духьувкун, лавгзаманнул миллатрал лаххиялул кьимат бушиву ккаккан буллалисса гъилисса асар цIанилва биян буллай буну тIий. Майял гьанумур мурадгу, миллатрал лаххиялийх уттизаманнул къалай дурккун, жагьилминнангу вай лаххия ххуй дизан дуван ччишиву буну тIий. Бургияра зулва бавахъул цукунсса лаххиялуву занай бивкIун бурив, цукун ччинал хьурдай чинсса гьухъри бивкIун бурив, цукун дахIалайсса чIунну диркIун дурив учинсса. Майял миллатрал хьхьичIарасса лаххиялух къулагъас дуваву цичIав тамаша бизансса ишгу бакъар. Ванил нину, Дундардул душ Саидат Кьурбанова, аслийсса лакку культуралул хIакьсса патриот, миллатрал ххазинарттал кьимат кIулсса, цуппа заллу­сса ателье бусса, мудангу миллатрал лаххиялух къулагъас дусса инсан бур. Лакрал хъунасса патриот, миллат ябаврил ххуллий ччувччуну най ивкIсса ­тарихчи ва чичу Дундар ХIажиевлул душгу цамур куццуйсса бикIан къабюхъайссия.

Шиккува кIицI лаганна, МахIачкъалалив миллатрал дукрарду дуллалисса кафегу сайки цалчин Саидатлул сипталийну ва хIарачатрайну тIивтIуну, зузи бувшиву. ХIакьину «Инт» цIа дусса каферду Дагъусттаннал агьалинан ва туристътуран ххирану бушиву. ОьрчIнияцIава ниттил ательелуву диялсса чIун гьан дуллалисса Майявунгу гъира багьну бур, ниттил кунна, усттарну янна дурухлай, цIу-цIусса дизайнну ляхъан ­дуллай, инсантал ххари буллансса. Ва мурад хьхьичIун лавсун дуклан бувххун бур Дагъусттаннал Педагогикалул институтрал художественно-графический факультетрайнгу. Дуклай бунийва модалул дунияллий итталун багьуна Майя итххявхсса дизайнер хIисаврай. На ванищал цалчинсса интервью дурссия, ванил «Ккуллал баркьутру» тIисса дипломрал даву тамаша дирзун. Тани жунма личIину сийлий, бусравну бакъасса баркьутирттах цамур куццуйсса ябитаву дуван бувнав Майял мюрщи баркьутирттал коллекциялул. Миллатрал культуралухсса куртIсса ччаву хъиннура цIакь хьухьунссия ваниву кьатIаллил билаятрай яхъанахъисса ппурттуву. Ливаннал хъун шагьрулий Бейрутрай машгьурсса ательераву практикалийгу бивкIун бур ва цила чIумал. Цайми чIявусса билаятирттал лаххиялул хIисав ларсун, ванил мурад бивкIун бур лакрал душваврал лаххия гьаз дуван, цIу дуккан дуван, уттизаманнул элементругу хIала дурну, «Бузмалун» цIусса оьрму булун. Ва даву цищара лавайсса даражалий бартдигьин бювхъушиву ккаккан бунни Майял Москавливсса модалул выставкалийгу. Ванил коллекциялуву фольклор ва уттизаманнул элементру хIала-ккалану даркьуну дур, бавахъал заманагу, уттисса чIумул тарихгу, ччалай бакъарча, дусшиву дурну, ца ххуйну капливун багьну бур. Лаххиялуву этносрал лавгмургу, хIакьинумургу муттаэтал хьун къабивтун, цIусса цIай бучIан баву дизайнернал магьиршивур. ХьхьичIазаманнул бузмардан цIанасса чIумул модныйсса цIай бучIан бувсса ванил ххаллил гьухъри тIалавнугу бур. Майя хъинну хъирив лавну миллатрал тарих лахьлахьисса душ бур, ванил гъирарай цикссагу материаллу архиврдаву ххилтIу дурну дур, хьхьичIарасса суратирттавун кьувтIуну бур, нукIузаманнул янна яхьу­минна­чIах, ядурминначIах буклай, биялсса захIмат бувну бур. Ватандалухсса, миллатрал коло­ритрахсса ччаврил гьава­слан бувну хIасул бувсса коллекция тIайлабацIу бакъасса бикIайхрав.

«Дизайнер так гьунарданийну, бюхъу-бажарданийну гьаз къашайссар, биялсса захIмат бишин багьлагьисса пишари. ЧIалай бур Майя захIмат ххира­сса зузала бушиву. Цуксса захIмат бишин багьлай бур духларгун нанисса миллатрал колорит уттизаманнул кьяйдалийн дуцин, цIу дуккан дуван, цуксса ччавугу, гъирагу, гьавасгу аьркинсса даву дур. Вай цимур-ца цивура дусса авторнаща бювхъуну бур цилва коллекциялувугу магьирну ккаккан дуван жулла культуралухсса ччаву, бавахъал лаххиялухсса хIурмат.
Цаннияр ца исвагьисса, ябацIансса лаххияртту дур Майял коллекциярдал, кьатIаллил билаятирттал сийлийсса выставкарттайн ххуллугу лавсун, цIакьсса цинмасса кIанугу ­бугьанссар тIисса вихшала цIакь хьунни дакIниву, чIа учинну тIайлабацIу», – тIий бур Тулалия ванил коллекциялий тамаша бан бувкIсса хIакин, ТтурчIиял шяравасса Зарема Аьлиева. ВаницIун бавкьуну, жугу дуллалимуниву тIайлабацIу чIа тIий буру СагидахIмадлул душнин, Майян! «Бузмалун» – илкин­сса, гьартасса ххуллу!
ПатIимат Рамазанова