Апрельданул 18-нний Къумукьнал музыкалул ва драмалул театрдануву хьунтIиссар республикалий сакин буллалисса Щалагу Аьрасатнал зузи кIанттурдал (вакансиярттал) ярмукIа. Гьашину укунсса ярмукIа шамилчинсса шиналли буллалисса. Ва ххуллухь мероприятие дуллалиссар 47 площадкалий. Хъуними площадкарду сакин буван тIий бур МахIачкъалалив, Хасавюртлив ва Дарбантлив (ми чув хьунтIиссарив кIул бувантIиссар махъсса ппурттуву), ливчIми 44 буван тIий бур Агьали зузи кIанттурдал дузал байсса центрдай.

Мартрал 24-нний «Дагес­тан» РИА-лул редакциялий хьунни пресс-конференция. Ваний гьуртту хьунни ДР-лул захIматрал ва социал иширттал министрнал хъиривчу Жабраил Жабраилов ва ЗахIматрал миграциялул ва давурттал дузал байминнащалсса дахIавурттал отделданул каялувчи Мажид Аьлиев.
Министерствалул вакилтурал бусаврийн бувну, сайки 500 зузи кIану дузал байма (работодатель) учIан тIий ур инсантуращал хьунаакьин республикалиягу, билаятрал цайми регионнаягу.
Республикалул предприятиярттал вакилтурал ярмукIалий жула инсантурал хьхьичIун ласун тIий бур сайки 3000 зузи кIану (вакансия), мукунма 30 азарваксса зузи кIантту ккаккан бантIий бур цайми регионнаясса даврил дузал байминналгу.
«Министерствалул оьвтIий бур цинявннайн, давуртту дуллалиминнайнгу, давуртту лякъин ччиминнайнгу, Давур­ттал дузал байсса центрданий сияхIрайн лавсминнайнгу, ду­ккаврил ­заведенияртту къуртал бувминнайнгу, мукунма студентътурайнгу, цамур даврий бацIан ччиминнайнгу», – кунни Жабраиловлул.
Давурттал дузал байминнаща бюхълай бур цачIавасса зузи кIанттурдащал кIул буван давурттай бацIан ччими, ми чув ялапар хъанай бухьурчагу – ччарча жула республикалий, ччарчагу цайми регионнай.
«Шиная шинайн давур­ттал дузал байминнал аьдад гьарза хъанай дур. Ва ххуллухь ярмукIалий зузи кIанттурдащал кIул бантIий бур Дагъусттаннал обороналул, промышленностьрал, шяраваллил хозяйствалул, машлул, дукиялул, туризмалул предприятиярттал вакилтурал», – увкунни Мажид Аьлиевлул.
ЯрмукIа буллалиссар «Кадры» национал проектрал лагрулий. Дагъусттаннал ЗахIматрал ва социал иширттал министерствалул ва нацпроектрал лагрулий бартдигьлагьиссар «Активные меры поддержки занятости» ва «Образование для рынка труда» тIисса проектру.