Мартрал 26-нний Расул ХIамзатовлул цIанийсса Национал библиотекалуву хьунни ДР-лул Экономикалул министерствалул хIасиллая ва гьашинусса шинал хьхьичI бивхьусса агьамсса масъаларттая бусласисса коллегия. Ваний гьуртту хьунни ДР-лул экономикалул министр ХIажи Султанов, ДР-лул ХIукуматрал председатель Аьбдулмуслим Аьбдулмуслимов, Дагъусттаннал ХIукуматрал председательнал хъиривчу Руслан Аьлиев, ДР-лул Халкьуннал Мажлисрал депутат Марат Илиясов, муниципалитетирттал бакIчитал, жяматийсса ишккаккулт, журналистътал ва цаймигу.

Коллегиялул даву дайдир­­хьу­­нни Аьб­дул­муслим ­Аьб­­­­­­дул­­­мус­лимовлул.
Премьер-министрнал кIицI лавгунни, ведомствалул ларгсса шинал ­ даврил хIасиллайн бувну, Дагъусттаннал агьалинал багьу-бизу хьхьичIунмай хьушиву, социал-экономикалул ккаккияртту лайкьсса даражалий­сса душиву.

– ХIакьинусса кьини Дагъус­ттаннай экономика хьхьичIуннай хъит учин даву мурадрайсса хьхьичIунсса 6 проект дуссар бартдигьлай. Вай иширайну дузрайн дуккан давриву Дагъусттан Ухссавнил Ккавкказуллал федерал округрайсса субъектирдал дянив 1-мур ххуттай буссар. Умуд бур 2025-ку шиналгу укуннасса ккаккияртту дикIанссар тIисса, – увкунни ванал.
Премьер-министрнал мукунма кIицI лавгунни, Экономикалул министерство жаваблувсса масъалартту бартбигьавриха, экономикалул политика хIасул давриха зузисса хъуннасса агьамшиву дусса ведомство хъанахъишиву.

– Экономикалул министерствалийн тапшур бувну бу­ссар миллатирттал проектру, паччахIлугърал программартту ва хьхьичIунсса проектру бартдигьаву.
Коллегиялий кIицI лавгунни Дагъусттаннай итадакьлакьисса продукция ххи хьушиву.
Лавайсса даражалий бартдиргьуну дур хьхьичIунсса проектру.
ПаччахIлугърал программартту, миллатирттал проектру бартдигьавриву хьун дурсса хьхьичIуннайшивурттахлу Аьбдулмуслим Аьбдулмуслимовлул барчаллагь увкунни Руслан Аьли­евлухь ва ХIажи Султановлухь.

Ххюра шинал мутталий ­Дагъусттаннай кIилийну лахъ хьуну дур миллатирттал проектру лядуккан даврил даву. 2019-ку шинал вай проектру бартдигьаврийну бюджетравун бувкIун бур 50,46 % арцул, 2024-ку шинал тIурча — 99,8% .
Коллегиялул даврий личIи­нува бавцI­унни зунттал кIантту хьхьичIунмай баву мурадрайсса паччахIлугърал программалий. Вания балжину бувсунни ХIажи Султановлул. ХIакьинусса кьини республикалий зий дур зунттал халкьуннал мурадру буручлачисса комплексныйсса программа. 2024-ку шинал паччахIлугърал шяраваллил хозяйствалуха зузисса 300 инса­ннан кумагран итабавкьуну бур 105,6 млн къуруширттал.
2025-ку шинал даврил пландалуву бур бизнесрал ва элмийсса идарарттащал цачIуну шяраваллил хозяйствалуха зузиминнан ка-кумаг баву мурадрайсса, цIу-цIусса чаранну ляхълай чялишну зузаву.
АрхIалва зун най бур зун­ттал районну хьхьичIуннай даву мурадрайсса база хIасул бавриха. ВаницIун бавхIуну, октябрь зуруй хьунтIий бур цIанихсса аьлимтурал, экспертътурал ва Аьрасатнащал хIала-гьурттусса хIукуматирттал вакилтурал гьурттушиндарайсса «Устойчивое развитие горных территорий» тIисса цIанилусса щалвагу Аьрасатнал форум, 100% бартдиргьуну дур зунттал районну ядаву мурадрайсса паччахIлугърал программа.
2024-ку шинал 7 направлениялул паччахIлугърал программартту бартдигьаврин итабавкьуну бур 105,6 млн къуруширттал .
– Ларгсса шинал бизнесрал вакилтурал, элмийсса сообществарттал, кIанттул цила каялувшиннарал ва республикалул исполнительный властьрал органнал низамрайн дурцуссар паччахIлугърал программалул лагрулийсса ка-кумаг баву мурадрайсса давуртту. ХьхьичIва-хьхьичI нирхиравун руртссар электрон журалий хIукуматрал чулухасса кумаг тIалав баврил даву. Ва давриву методикалул чулухасса кумаг баврихлу барчаллагь учин ччай ура ДР-лул Шяраваллил хозяйствалул министерствалул ва Дагъусттаннал ишбажаранчитурал комитет­рал пишакартурахь, – увкунни ХIажи Султановлул.

2024-ку шинал 2 инвестициялул проект ххишала хьуну дур Дагъусттаннал аьрщи анаварсса бущилий ишла даву ва хьхьичIуннай даву мурадрайсса реестрданул сияхIрай. Экономикалул министерство чялишсса давуртту дуллай бур республикалийн цIу-цIусса инвестортал кIункIу баву мурадрай.
– ХIакьинусса кьини ТОР-данул реестрдануву дур 600 инсаннансса зузи кIантту хIасул буллалисса 3,9 млрд къуруширттансса проектру зузи дурсса 18 предприятие.
Республикалул экономика лядуккан даврин хъунма­сса мюнпат бусса дур цIуну кьамул дурсса проектру. Мукунсса дур ларгсса шинал кьамул дур­сса 2 проект: «Новая жизнь» ва «Золотые пески», – увкунни министрнал.

ХIажи Султановлул бувсунни, предприятиярттал даврил даража гьаз баву мурадрай кьамул дурсса «Производительность труда» миллатрал проектраягу. ХIакьинусса кьини Да­гъусттаннай ва проектраву гьуртту хъанай дур шяраваллил хозяйствалуха, транспортраха, строительствалуха ва цаймигу сферардаха зузисса 12 предприятие.
2024-ку шинал дурсса давурттавасса дур туризм ва хъамал кьамул баврил индустрия. Республикалий зий дур туризмалул инфраструктура хьхьичIуннай даврин хас дурсса 87 проект.
КьатIаллил хIукуматирттащалсса дахIавур­ттая буслай, кIицI лавгунни хъунисса хьхьичIуннай­шивуртту хьушиву. Махъсса 5 шинал мутталий кьатIаллил хIукуматирттащалсса машлул арарду кIилийну ххишала хьуну дур.

Дагъусттаннал импортрал ва экспортрал ишру бачин бувну бур сайки 70 хIукуматращал. Жула республикалущал яла чялишну зузими партнертал бур Азирбижаннал, Белоруссиянал, Гуржиял, Иракьнал, Ираннал, Къазахъисттаннал, Китайнал, Туркнал ва УзбакIнал хIукуматирттаясса.
2024-ку шинал республикалийн бувкIун бур 8 чил билаятраясса 11 делегация. КIира кьутIи дурну дур чил билаятир­ттаясса партнертуращал.
Министрнал кIицI лавгунни, хIакьинусса кьини респуб­ликалий иширайну зий душиву инвестициярттал хъунисса проектру.
Дарбант шагьрулул бакIчинал хъиривчу ХIажиамин Рамалдановлул бувсунни, ва шагьрулул багьу-бизу ва туризмалул инфраструктура хьхьичIуннай даву мурадрайсса проектрая. Ва дузрайн дуккан даврин кумагран итабавкьуну бур 2,7 млрд къуруширттал.

Республикалул инвестициялул программартту дузрайн дуккан давриясса доклад бунни ДР-лул экономикалул министрнал цалчинма хъиривчу Адильхан АхIмадовлул.
Миллатирттал проектру чулийн дуккан даврийну республикалий хьусса дахханашивурттая бувсунни ДР-лул экономикалул министрнал статс-секретарь-хъиривчу Камил Изиевлул.
Ведомствалул хIасиллая бувсун махъ, министерствалул давриву хьхьичIунсса ккаккияртту чIалачIи дурсса пишакартуран дуллунни паччахIлугърал ва хIукуматрал наградартту.
Аьбдулмуслим Аьбдулмуслимовлул барчаллагь увкунни паччахIлугърал бигарду лайкьсса даражалий бартбигьлай ­зузисса экономистътурахь.
Имара Саидова