Мартрал 15-нний Дагъусттаннайн къуллугърал аьрххилий увкIсса АьФ-лул экономикалул лябуккулул министр Максим Решетниковлул ва Республикалул бакIчи Сергей Меликовлул дунни жула региондалул социал-экономикалул масъаларттал хIакъиравусса батIаву.
Вайннал ххал бивгьунни республикалул энергетикалул ва ЖКХ-лул предприятиярттал программа бартдигьаврил, коммунал ва энергетикалул инфраструктура лядуккан даврил, Аьрасатнал Федерациялул паччахIлугърал программарттал ва национал проектирдал инструментру ишла баврил ва Каспийлул зумардайсса кластерданул масъалартту.
Министрнал тIимунийну, Дагъусттаннал ккаккан буллай бур экономикалул хъин чулийнмасса лябуккулул бущи.
«Махъсса шиннардий Дагъусттан бувккунни ххинугу хьхьичIунмай хъит увкусса лябуккулул бущилийн. Ххуйсса хIасиллу хьун дунни ларгсса шиналгу. ХьхьичIунмай бавчунни циняв приоритетсса бутIри: шяраваллил хозяйство, туризм. Яла агьаммур – шамилчинмур шинал гьарза хъанай дур инвестициярду, ларгмур шинал хIасиллайну +8,3 %. Ва агьамсса хIасилли, президентнал ва хIукуматрал хIукмурдал кабакьулийну, региондалул командалущал цачIу хьун дурсса. Ми хъанахъиссар прорывсса проектру бартдигьавугу, СКФО-лул ПаччахIлугърал программарттал ва профилсса нацпроектирдал лагрулийсса инвестициярттацIун кабакьавугу», – увкунни Максим Решетниковлул.
Дагъусттаннал бакIчинал тIимунийну, мукунсса хIасиллу хьун даншиврул региондалул ишла буллай бур федерал кабакьулул чаранну. Масалдаран, хIукумат кумаг буллай дур чан дуван транспортрал ссуссукьушивурттугу.
Апрельданий региондалий тIитIин тIий бур 9 километралул манзилданийсса Хасавюрт шагьрулул лагмасса ххуллу. Буллай байбивхьуну бур Дарбантуллал лагмасса ххуллугу. Муния махъ буллай байбишин тIий бур МахIачкъалаллал лагмасса ххуллугу. ЦIанасса ппурттуву гьануцIакул бакьин буллай бур федерал ххуллу «Ккавкказ». Графикрай дур региондалул 3 ххуллу баврил ва Каспийскаллал туристътурал кластерданул проектру дузал даврил давуртту».
Максим Решетниковлул бувсунни региондалул хъунмур мурадну хъанахъишиву лябуккулул бущилуцIун кабакьаву, му бущи буруччаву, цIанасса кабакьулул чаранну мюнпатну ишла буллай, ссуссукьушивуртту духлаган даву. Яла-яла инфраструктуралулсса.
БатIаврий ххал бивгьунни Дагъусттан «Профессионалитет» цIанилусса федерал проектравух гьуртту шаврил масъала. Муния махъ къулбасру дунни «КАВКАЗ. РФ»-лулгу, ОЭЗ-лулгу, ДР-лул кIулшиву дулаврил идарарттал ва биттуршиндарал властьрал органналгу дянив дянивмур даражалул профессионал кIулшиву ласаврил кластер баврил рязишиндарай.
АьФ-лул Экономикалул лябуккулул министерствалул делегациялул ххал бивгьунни ЖКХ-лул модернизациялул программалул объектругу.
