Аьбдуллаева Шагьриман
ХIажинал душ
Вай гьантрай аьпалухьхьун лавгунни цила оьрмулул хъунмур бутIа оьрчIан кIулшиву дулаврин ва ми тарбия баврин хас бувсса ххаллилсса педагог, хьхьичIунсса филолог, хъинсса нину, Ккурккуллал шяравасса Аьбдуллаева Шагьриман ХIажинал душ.
Бувну бур Шагьриман 1935-ку шинал мартрал 22-нний Ккурккуллал шяраву. 1952-ку шинал къуртал бувну бур Ккурккуллал дянивмур даражалул школа, 1956-ку шинал — Дагъусттаннал педагогический институтрал филологиялул факультет. 1957-1960-ку шиннардий зий бивкIун бур Ахъушиял райондалийсса Хъюллал школалий, 1960-1966-ку шиннардий цила ласнащал, физкультуралул учитель Пятали МахIаммадовичлущал — кIара райондалийсса Тебек-мащиял школалий. 1966-ку шиная байбивхьуну, зун бивкIун бур Ккурккуллал дянивмур даражалул школалий. МукьцIаллийхъайсса шинну дурну дур ванил оьрчIан кIулшиву дулаврил ххуллий дакIнийхтуну захIмат бихьлай. Шагьриман ХIажиевна бия цила пишалух эшкьи хьусса, куртIсса кIулшивуртту дусса, оьрчIах ччаву дусса, Заннала учительну ляхъан бувсса инсан. Ккурккуллал школалий дуклай бивкIсса шиччавассагу, лагма щархъаяссагу оьрчIаву цикссагу лякъинтIиссар Шагьриман ХIажиевна яла ххирамур учительницая, ванил дарс яла ххирамур дикIайссия тIисса. Мяйжаннугу, Шагьриман ХIажиевнал дишайва дарс ляличIинура, асар хьунну, дюхханну, оьрчIавун гъира-гьавас бутанну.
Ва бусравну бикIайва даччин дакъасса, тIайлану кьимат бишайсса учительница хIисаврайгу. ХIакьинусса кьинигу дакIнин дичлан бикIай ванил хIадур дурсса литературалул вечерду, композицияртту, постановкартту. ДакIних буккайва литературалул произведениярттавасса парчри. Школалул мероприятиярттай, оьрус мазрай бикIу, лакку мазрай бикIу, ванил бюхханну, пасихIну бувсса ихтилатру асар шайва цинявннан. Мажал бакъашиврух къабурувгун, дарсирдая махъсса чIумал лагайва интернатрайсса оьрчIачIан консультациярду дан. Ванил каялувшиву дуллалисса классру гьарица ишираву хьхьичIунну бикIайва. Шагьриман ХIажиевнал цIа дикIайва райондалий хьхьичIунсса учительтурал сияхIрай. Ккаллину бикIайва ца яла кIулшиву думур филологнан. Ванил хIурмат хъунмасса бикIайва дуклаки оьрчIачIа ва миннал нитти-буттачIа. Дуклаки оьрчIан ва бия учительгу, дакIниймур кIибачIайсса дусгу, маслихIатчигу. ТIайлашиву ччисса, яхI-къирият дусса, инсаншиврул бутIа буллусса, гьарица ишираву эбратрансса Шагьриман ХIажиевна бусравну бикIайва шяраваллил жяматрачIагу.
Ва бия захIматрал ветеран. Пишалул ххуллий бивхьусса захIматрахлу лайкь хьуну бия личIи-личIисса наградарттан, яла бусравмур наградалун ванил ккалли байва дуклаки оьрчIал бивщусса кьимат. Школа къуртал бувну лавгун махъгу чIявуми бучIайва цала ххирасса учительницачIан биян, чIявусса бучIайва барчаллагь тIисса чагъарду, барча буллалисса открыткартту. Жяматралгу, дуклаки оьрчIалгу дя
нив Шагьриман ХIажиевнал кьариртссар цила цIа бусраврай ва хIурматрай. Ва аьпалул шаврил кьурчIишиву кIидачIлай, жижара буллай буру оьрчIахь, махъсса гъан-маччанахь. РухI бигьаний дишиннав, алжаннул ххари баннав, гьав нурданул дуцIиннав.
Ккурккуллал жямат
Хъуннасса кьурчIишивугу кIидачIлай, дакIнийхтунусса жижара буллай буру жулва даврил уртакь Штанчаева Жавагьи Залкиприл душнихь, ванил уссур-ссуннахь, щалвагу агьлу-авладрахь, аьзизсса нину Магинур жуятува личIи шаврийн бувну. Ва буссия мяйжаннугусса зунттал хъамитайпа.
Магинурдул рухI хъинний дишиннав, бунагьирттал аьпа баннав, махъминнал оьрмурдай барачат бишиннав.
ГьунчIукьатIрал дянивмур даражалул школалул коллектив
ва «Дараччи» клубрал душру
Аьбдуллул арс ХIажиев Рамазан (Роман)
Лахъисса хIаллай къашавайгу ивкIун, захIматсса цIуцIаврища ххассал хьун къабювхъуну, оьрмулул 66 шинаву жуятува батIул хьунни ххаллилсса чув-адамина, дакI-аьмал авадансса инсан, Карашрал шяравасса Аьбдуллул арс ХIажиев Рамазан (Роман).
Увну ур Рамазан 1959-кусса шинал Карашрал къутандалий Аьбдуллул ва Аьишатлул къушлий. Школалий дуклай ивкIун ур къутандалий ва Шамхал-Терменнай. 1977-кусса шинал лавгун ур армиялийн. Мугу лавхъун, зана хьуну махъ, ккалай ивкIун ур Автодорожный техникумраву ва Автодорожный институтраву. Муния мукьах цаппара хIаллай зий ивкIун ур Техобслуживаниялул станциялий.
1992-ку шиная шинай хIакьинусса кьинилийн ияннин, Рамазан зий уссия Дагъусттаннал таможнялий инспекторну.
Цала агьлу-авладралгу, Карашрал жяматралгу, дустуралгу дянив мудангу бусрав-сийлийсса инсан уссия Рамазан. Лавгссия хIажлийнгу, буручлай уссия дин-имандалул ххуллу-ххагу.
Цибанссар, Заннал чичрулун чаран лякъин къашай. Хъуннасса пашманшивугу кIидачIлай, дакIнийхтунусса жижара буллай буру Рамазаннул арснахь Аьбдуллухь, ссурваврахь ПатIиматлухь ва Эльмирахь, кулпатрахь Зуйдухлухь, махъсса цинявппагу уссур-ссуннахь ва гъан-маччаминнахь. Цал бунагьирттал аьпа баннав, рухI бигьаний дишиннав, алжаннул ххари аннав.
Карашрал жямат, дустал, гьалмахтал
