Ларгсса хамискьини Къумукьнал театрдануву хьунни «Я крикну миру, что Я – Мать солдата!» тIисса, хъаннил байрандалун ва Хъун дяъвилий Ххувшаву ларсун 80 шин там шаврин хас дурсса Республикалул хъаннил форум.

Ва хасъсса аьралий операциялий талатисса аьралийтурал кулпатру цачIун баврил, тарихрал аьпа ябаврил ххуллийсса форумрал сакиншинначиталну бия ДР-лул Миллатирттал политикалул ва диннал иширттал министерство.

Министр Энрик Муслимовлул Республикалул бакIчи Сергей Меликовлул цIания барча кунни бавтIминнахь ялун бувкIсса мубараксса Рамазан барз ва хъаннил байран. КIицI лавгунни, гьамин, ниттихъал бушиву бизлай ттизаманнул нигьачIавурттайн къарщи дацIан бюхъайсса ник тарбия даврил гьану.
– Яла ххуймургу, хъинмур­гу хъамитайпа нинур. Яла хьхьичIунмур нину – аьскарнал нинур. Мяйжаннугу, гьарца ниттища бюхъайссар пахрулий учин «На солдатнал нинура» куну. Хъамитайпалул яла бюхттулмур къирият – цалла ватан дуруччин бюхъайсса лайкьсса арс тарбия авур. Му бакъассагу, ттун ччива кIицI лаган, республикалул жяматий­сса ккураннал дянив яла чялишну зузими душиву хъаннил ккуранну. Мунил тIутIиссар жула ялун бучIантIимур бушиврия, гьамин, нину хъанай дуну тIий оьрму булаврил ва лайкьсса тарбия дулаврил гьануну, – кунни министрнал. Муния махъ Энрик Муслимовлул Миллатирттал политикалул ва диннал иширттал министерствалул лишан дуллунни хасъсса аьралий операциялий ватандалул мурадру буруччаврил ххуллий талатисса ххюя арснал буттан – Оьма­ров АхIмад Оьмардул арснан. Дагъусттаннал Хъаннил союзрал ва Аьралийтурал кулпатирттал комитетрал хъунмур Интизар Мамутаевал бувсунни Дагъусттаннал хъаннил патриотизмалия, жула ватан дуруччайминнал оьр­мулуву ниттихъал агьамсса кIану бугьлай бушиврия, билаятрал ялун бучIантIимунил ххуллий буллалисса захIматрая.

– Ва форумрал агьаммур тема дур патриотизм. Жува гъалгъа тIий буру цала оьрму ватандалуцIун бавхIусса хъанния, хасъсса аьра­лий операциялий арсру талати­сса ниттихъая. Буттал кIанттул цIанийсса Хъунмасса дяъвилул шиннардий Дагъусттаннал хъами, дяъвилул захIматшивурттал ва ккашил сасан бувсса щала Совет Союзрал хъами кунма, бувк­ссар Ватандалул махъ бацIан. Та яла захIматсса 1942-ку шин ласурчагума, цала хушрай аьрайн лавгун бур 1800 душ. Хъун дяъвилий Дагъусттаннал хъаннил ккаккан дурссар къучагъшиву ва кьянкьашиву – къуллугъ буллай бивкIссар гьарцагу журалул аьралуннаву: связисткахъулну, летчицахъулну, зенитчицахъулну, шоферталну, хIакинталну, медсестрахъулну. ДакI тIайлану биттур буллай бивкIссар ватандалул хьхьичIсса цала бурж. ХIакьинугу дуручлай бур жула хъами патриот-талаталал, аьскарнал ниттил сиппат, – увкунни Интизар Мамутаевал. Ванил кIицI лавгунни ттуршунния ливчусса хъами-душру бушиву хIакьину хасъсса аьралий операция нанисса кIанттурдай къуллугъ буллай…
Аьрасатнал Виричу, Дагъус­ттаннал Мюхчаншиврул советрал секретарь МахIаммад Баачиловлул дакIнийхтуну барчаллагь увкунни Оьмар АхIмадовлухь – ватандалул ххуллий жард къакуну талатисса ххюя арс тарбия аврихлу. КIицI лавгунни, цалагу арс СВО-лий талай ухьувкун, кIидачIлай ушиву хасъсса аьралий операциялий арсру талатисса кулпатирттал ялун дирсса хIасратру. Ялагу Баачиловлул кIицI лавгунни жула рес­публикалия Аьрасатнал Виричу хьусса ушиву ххюцIала чув. Ккалли бунни ва ялун нанисса никиран агьамшиву хъуннасса иширан.
– Ва мероприятие хаснура аьркинну дур хасъсса аьралий операциялий ватандалул ххуллий жанну дуллусса нитти­хъан, дяъвилул майданная арсру ва ласру зана хьуннин ялугьлагьисса хъаннин. Барчаллагь жухра дуллалисса къулагъасрахлу. Бу­ттал кIанттул цIанийсса Хъунмасса дяъвилул шиннардийгу, хIакьинугу хъамитайпа –вихшаласса къинттар, – увкунни Аьра­сатнал Виричу НурмахIаммад ХIажимахIаммадовлул ниттил Сапижат Мазаевал.
Форум къуртал хьунни Дагъу­сттаннал цIанихсса балайчитурал концертрайну. Гьуртту хьуминнан ахирданий дуллунни бахшишру.

Зулайхат Тахакьаева