Мартрал 17-нний ДР-лул Национал библиотекалуву хьунни республикалул Промышленностьрал ва машлул министерствалул коллегиялул гьартасса заседание. Му дачин дурну ия ДР-лул ХIукуматрал председательнал хъиривчу Ризван ГъазимахIаммадов. Муний ххал диргьунни министерствалул 2024-ку шинал дурсса давурттал хIасиллу ва бувсунни 2025-ку шинал дансса давурттая. Заседаниялий хъунмур махъ лавхъунни ДР-лул промышленностьрал ва машлул министр Низам Халиловлул.

Ванал тIимунийну, Дагъусттаннал промышленностьрал бутIуву хъинчулиннайсса дахханашивуртту хьуну дур. 2024-ку шинал промышленностьрал производствалул индекс, ванил хьхьичIмур шинал вара чIумух бурувгун, хьуну бур 101,8 %, зана-кьала даврил бутIуву – 102,1 %.
2024-ку шинал дуккан дурсса сурсатирттал лагру хьуну дур 97 971,7 млрд къуруш, ванил хьхьичIмур шинах бурувгун хъанай бур 121,0 %.
Ларгсса шинал АьФ-лул циняв даражардал бюджетирттавун ДР-лул промышленностьрал предприятиярттал дуллуну дур налогирттал 16,5 млрд къуруш, ягу хьхьичIмур шинах бурувгун – 113,5 %.
2024-ку шинал августрай УзбакIисттаннай тIивтIуну бур Аьрасатнал ва УзбакIнал цачIусса предприятие «Асадбек Гласс Фабер», микку дуккан дуллай бур пюрундалул ххаллу (стекловолокно).
2024-ку шинал ноябрьданий УзбакIисттаннай тIивтIуну бур Аьрасатнал ва УзбакIисттаннал цачIусса цамургу предприятие – ООО «ДЛКАР», тикку дуллай бур датчикру.
2024-ку шинал республикалий розницалий маша баврил лагру хьуну дур 924621,3 млн къуруш. (1-мур кIану — СКФО-лий, 14-мур – АьФ-лий).
Опталий маша баврил лагру хьуну дур 251742,4 млн къуруш, хьхьичIмур шинах бурувгун 25,3 % ххишалану (СКФО-лий — 2-мур кIану).
Дагъусттаннай 2024-ку шинал дукра дукайсса жяматийсса кIанттурдай бувну бур 130585,2 млн къурушрансса маша, ягу хьхьичIмур шиналнияр 5,4 % ххишалану (1-мур кIану — СКФО-лий, 5-мур кIану АьФ-лий).
2024-ку шинал республикалий дукра дукайсса жяматийсса кIанттурду гьарза хьуну бур 4,2 %. Ларгмур шинал гьарза хьуну бур 309 банкетрал зал, 285 ресторан, 1803 кафе ва 234 столовая.
Республикалий 2024-ку шинал багьлух дувайсса хIаллихшинну хьхьичIмур шинах бурувгун гьарза хьуну дур 3,1 %, цинярда дурну дур 209294,9 млн къурушрансса хIаллихшинну.

ХIасан Аьдилов