ЦIаххуйхъал ОьмархIажинан
Га ччатI ия гьарнан –
КIулнан, къакIулнан.
Га щин ия мудан –
Мюхтажнан, мякьнан.
Амма щин дуссаксса
Кьадру щин бикIай?
ЧчатI чIяву хьуссаксса
ХIурматгу щил бай?
Мурхьирдая чIапIив
Багьай, бакъа шай,
Инсан ивчIай, лагай,
Зана къаикIай.
Инсаннал цIа машгьур
Къадайссар кIанттул,
КIанттул цIа инсаннал
Дувайссар машгьур.
Юсуп Хаппалаев
Вил цIа даин дуссар жул дуаьлувух
Ина, ЦIуссалакрал
бакI дургьу чIумал,
Бутташиву дурссар
оьну ливчIминнан.
Ялгъузну ливчIминнай
аякьа дурссар,
ДакIнийгу уссара
ина жун мудан.
Ина бувксса «ххуллу»
жу бурувччуссар,
Зия хьун къабивтссар
вил аькьил махъру.
Район цIу ларгсса чIун
хIайп вин къаккарксса,
ХIайп вин ххал къархьусса
хъун шяравалу.
Уцин ччивав ина
неххал зуманийн,
Къуллугъчитал бавтIун,
вихьхьун махъ булун.
Яла, лагма лавгун,
къавтIун изан ан,
Щалла райондалийх
машалли уван.
Жу вин хIалал дурссар
«Геройнал» цIагу,
Виричунал данмур
дурну тIий ина.
Жул махъру чIалнугу,
багъишла бити,
Вил цIа даин дуссар
жул дуаьлувух.
Зайнуллагь Мирзоев,
ш. ТтурчIи
МахIмуд Аьлилов
Ниттихь
Кьаркь мурччайва кьавкьун бансса васият,
ЛичIи хьуну дияв, арс чIарав акъа.
Рищунгу дакъая памятьран сурат,
Мукунсса аьдатгу зунттаву дакъа.
Левххун увкIхьурчагу хавар баяйхту,
Чурттул личча дугьан ттуща къавхьуна.
Левчуна вил гьаттайн на увкIхьурчагу,
Вихь дакIниймур бусан ттуща къавхьуна.
ЦIуххинсса, бусансса ттул бухьурчагу,
СсихI дуклай бакъая бакIрацI кIалабарз,
ЧIу бакъа, макь рутIлай яру бунугу,
Къадурна хъисрагу ина къулагъас.
Гания шихунмай найнма бур гьантри,
Кьакьлай, щюлли хъанай вил гьаттай уртту.
Вил имин симангу дур ттущал архIал,
Вил чурх бухьурчагу нахIу шанаву.
Къадуккара, бавай, тачIав дакIния,
На шинну гьан дара вищал дакI дачIлай.
Инагу дайссия хьхьурду уттара
Ттул чурххайн лахханмур ххалух дурухлай.
Вила дакIнил хиял, чурххавусса жан
Арснахсса ччавриву ина дишайва,
Ина бивт яруннал, ттул аьзиз нинуй,
Ччяни биян байва баргъ дунияллийн.
Ина батIул хьусса кьини дуркIтари,
ТIутIащал учIара, бавай, вил гьаттайн.
Му кьини шяраву на акъахьурча,
Инара дучIара ттул кIаралличIан.
Гъази-Гъумучияха
Зунттаву хъуншагьруй, миллатрал кюруй,
Жул Гъази-Гъумучий, лакрал хъун пахруй,
Надиршагьтураща ласун къавхь къалай,
Тамирлантураща бух бан къавхь улчай!
Гъумучий, Гъумучий, Гъази-Гъумучий,
Гъумучий, Гъумучий, аьзиз Гъумучий!
Гъазитал цIа лайкьний паракьатну бур,
Вил хантурал аьпа бухлавгун бакъар.
Амма вил миналий халкь чан хьуну бур,
Бизарну ливчIун бур БурхIай-Къалагу.
Гъумучий, Гъумучий, Гъази-Гъумучий,
Гъумучий, Гъумучий, аьзиз Гъумучий!
Зунттаву хъуншагьруй, миллатрал пахруй,
Элмулул щаращий, вирттаврал кюруй,
ВацIилул ялттусса пирузи ссавнийх
Чаннал накьич дува, бачу хьхьичIунмай!
Гъумучий, Гъумучий, Гъази-Гъумучий,
Гъумучий, Гъумучий, аьзиз Гъумучий!
Залихха-зузалаха
Ярунниву цIу дусса,
Чурххаву чаннан дусса,
Гьайватсса чурххал заллуй,
Залиххай, вихар балай.
Дакьайва лархсса янна,
Пагьливаннай паснияр,
Бищайва ина мухIгу,
Марщайх маша бувцуну.
Хъассулгу пахру байва,
Пахру байва афнилгу,
Ина кунма ххуйсса душ
Шяраву лявхъуну тIий.
ЧIири лирчIунни хъуру,
Лухччайн дурккунни арду.
Ина бугьай гьаннарал
Аьш-бакIра духларгунни.
Щарнилва пахру байсса
Буллугъсса Лултту-Къурув
Бакъар ливчIун бувагу
Цавагу къурнил къулчча.
Къулчча-личIи ци зунссар,
Ссайну дуланмагъ хьунссар,
Ссуттил лачIал бугьай къур
Хан урттун ххявххун буний.
БурцIихьхьун биривсса ттуккухасса балай
НукIузаманнай яла бучIи лякъайсса ичIаллил хIайванну бикIайва ттукку. Муний духхайссия щин. Цила байссия хъув бичинсса парагу, мигу яла хъув буххайссия цила хъурзилттаву, хъу гъайчинсса хъарасгу, бугьансса гьаннагу биян байссия хъув цила бурхIай. Кув чIумал хъугу цилла гъай учайссия. ТтирхIуну махъ хъувату ччантIугу буххайссия цила. Яла гьарахъун къамагу биян байссия цила, гьарахъату иникьалигу духхайссия цилла. Лазунигу ттуккулъя духхайсса – циннассагу, ичIувасса цайми ризкьилунссагу. ХIухчалтращал арив, зунттуйн – ччимур кIанттайн яла бучIи лякъаймур ттуккуя. Тани учалагу буссия «Ттукку ужагърай бакъама ттуккул маша акъассар» тIисса. Утти тIурча ттуккул «вяъза» таман хьуну бур. ЦIана дарувран ттуккул накIлих луглай бур.
Шикку дакIнингу багьлай бур халкьуннаву лявхъусса укунсса хъярчийсса балайгу:
***
Бисмиллагь увкуну,
Ппалату бувкри,
Салаватгу руртун,
ЧчантIулийн лавгри.
Цаппара хIал хьуну,
Манзил лавгукун,
Гива лавай увкри
БарцI-МахIаммада.
Лажинни, заннаху,
БарцI-МахIаммадай,
Залуннан баянну,
Ца гьаъ чин бити.
Валлагь, къабитанна,
Цанни битайсса,
Ца мискиннал ччантIу
Вихь буки тIивав?
Ардарах дуккайсса
Гай лахъи ликри
Ххюрххугу дуруна
ЧчантIулул лагма.
Зунттава ав ласай
НякI тIутIул яру
Экьигу бувтIуна
ЧчантIулул дянив.
Гьалмахтал ххал хьувкун
Гьаъ учай ххуй кьацI
Акъабахъай бувна
БарцI-МахIаммадал.
Ххариний дацIан дай
Гай лахъи вичIив
КкукъархIунна дюркьри
БарцI-МахIаммадал…
