Ларгсса хамискьини Хъаннил байрандалул хьунийн Лакрал райондалул бакIчи Юсуп МахIаммадовлул барча бунни администрациялий зузисса хъами. Дуллунни тIутIив ва бахшишру.
Вара кьини Гъумучиял Магьирлугърал къатраву хьунни байрандалун хас дурсса шадлугъ. Муний яла бусравми хъамал бия хасъсса аьралий операциялий ватандалул мурадру буруччаврил ххуллий талатиминнал ниттихъул ва хъами.
Юсуп МахIаммадовлул, хъами барча буллай, кIицI лавгунни райондалул оьрму хьхьичIунмай шавриву хъаннил бугьлагьисса кIану. Хаснура къулагъас дунни СВО-лий талатиминнал ниттихъах, ссурваврах, хъанних, душваврах. КIицI лавгунни вай бушиву ва жапасса чIумал дакI дансса мукъух мюхтажну.
«Гьар заманнай хъамитайпа бивкIссар ва личIлачIиссар ххуйшиврул, хъиншиврул, ттюнгъашиврул ва аькьилшиврул лишанну. ЧIа тIий ура ва караматсса кьини цIуллушиву, тIайлабацIу ва барачат! Хаснува барчаллагь тIий ура хIакьсса арамтал – ватан дуруччулт тарбия бувсса ниттихъахь. ДакIнийхтуну чIа тIий ура, ччясса мутталий хасъсса аьралий операциягу къуртал хьуну, зул аьзизми сагъ-саламатну зана шаву! Му кьини дучIаннин ялугьлагьиссару жува цинявппа», – увкунни Юсуп МахIаммадовлул.
Байран къуртал хьунни Гъумучиял магьирлугърал къатлул зузалтрал ва оьрчIал искусствардал школалул тарбия буллалиминнал хIадур дурсса концертрайну. Ахирданий хъаннин дуллунни тIутIив.