ЦIуссалакрал райондалий акробатикалул тренерну зий сайки 50-ннийн дирсса шинну хьуну дур Анисат ХIусайновал. Ванил хъунмасса захIмат бивхьуну бур лагма щархъавусса оьрчIру спортрахун машхул буллай. Цила пишалийн дакI тIайласса Анисатлул чIярусса шиннардий бивхьусса захIмат дузрайн бувккун бур. Ванил тарбиялувтурал Аьрасатнал ва республикалул лагрулийсса соревнованиярттай цимилгу хьхьичIунсса кIанттурду бувгьуну бур.
Анисат бувну бур 1963-ку шинал Чапаево шяраву, хIурмат-кьиматрайсса Сидал ва ПатIиматлул кулпатраву. Ванил нитти-буттал, лайкьсса тарбиягу дуллуну, чивун буккан бувну бур арулва оьрчI. Анисат чIивинияцIава гимнастикалийн заназисса, спорт ххирасса, итххявхсса душ бивкIун бур.
– Акробатикалухун багьсса ттуярва хъуними ссурахъаврал дуллалисса трюкру ххуй дизлай, миннал хъирив тикрал дуллан бикIайссияв, – тIий бур ва.
Анисат, 1980-ку шинал школагу къуртал бувну, дуклан бувххун бур Хасавюртливсса Педагогикалул колледжрал физкультуралул факультетрайн. Шивун бухханнингу, ва Москавуллал циркрал ва эстрадалул искусствалул училищалуву дуклансса хияллай бивкIун бур. Экзаменнугу лавайсса даражалий дуллуну, бувххун бур училищалувун. Амма ванин шикку дуклан кьисмат хьуну бакъар.
Педколледжраву Анисат хьхьичIунну дуклакисса, преподавательтуран ххирасса студентка бивкIун бур. Ванил, бакI гьаз къадурну дарсру лахьлай, цинярдагу экзаменну хьхьичIунсса хIасиллай дулайсса диркIун дур. ХIасил, колледжраву дуклакисса ппурттуву ванин бувчIуну бур спорт цила оьрмулул мяъна-мурадну хьунтIишиву.
Анисатлул колледжраву, личIи-личIисса соревнованиярттай гьуртту хъанай, мудан цалчинсса кIанттурду бугьайсса бивкIун бур. Дуклай бунува, цила опытгу, кIулшивугу оьрчIан дуллай, вардиш буллай бивкIун бур.
Колледж къуртал бувну махъ, Анисат ЦIуссалакрал райондалий акробатикалул тренерну зун бивкIун бур. Шикку ванил хIарачатрайну сакин бувну бур акробатикалул секция. Байбихьулий оборудование дакъашиврух ва хьунадакьлакьисса цаймигу захIматшивурттах къабурувгун, дуклаки оьрчIавун спортрах гъира-шавкь дутлай зий бивкIун бур.
Анисат бур буххаву цирив къакIулсса, цила пиша ххирасса, унгу-унгусса педагог. Цила тарбиялувтурал хьхьичIуннайшивурттал ванивун гихунмай хъиннува гъирарай зунсса шавкь рутлай дур.
Анисат Сидаевнал хIарачатрайн бувну, жагьилтурал дянив акробатикалул спорт машгьур хьуну дур.
Пишалул ххуллий ванин цикссагу захIматшивуртту духIлан багьну бур, цукунчIавсса шартIру дакъасса кIанттурдай оьрчIру акробатикалухун машхул бансса чараннугу лявкъуну, зий бивкIун бур.
ХIусайновахъал кулпат бур цIуминалийсса ЦIуссалакрал райондалийн цалчин бизан бувминнавасса. ЦIуминалий оьрму нирхиравун багьан бувасса чIумалгу, Анисатлул спортрахун машхул хьун ччисса оьрчIру цичIанма шаппай буцлай ягу школалул жанахIраву вардиш буллай бивкIун бур.
Анисат Сидаевна так ца тренер бакъара, ва бур насихIат бусан кIулсса, оьрчIаха ниттил куннасса аякьа дусса педагог.
Ва цила ужагърайгу иминсса, дакI-аьмал хъинсса нину бур. ЗахIмат ххирану, хъуниминнал хIурмат-кьимат буну тарбия бувну бур ванил цилами оьрчIругу. Вай, хъуни хьуну, цала-цала къатрай бур.
ЦIуссалакрал райондалул дуклаки оьрчIал цIания Анисат Сидаевна Хъаннил байрандалущал барча буллай, чIа тIий буру цIуллушиву, давриву хьхьичIуннайшивуртту, оьрмулуву тIайлабацIу.
