Ккуллал райондалийсса Хъусращиял Магьирлугърал къатрачIасса Халкьуннал театрданул хIакьинусса репертуардануву хъунмур кIану бугьлай бур ­Бюхттул­сса Ххувшаву ларсун 80 шин шаврин хас бувсса, Чанкура КьурбанмахIаммадовлул чивчусса «Саил», «Ниттил дард», «Шанма мурхь» тIисса произведениярттайн бувну бихьлахьисса инсценировкарттал.

Халкьуннал театрданул ­режиссерну ур гъирагу-шавкьгу дусса, гьунар бусса, цала даву дакIнийхтуну дуллалисса жагьилсса пишакар Марсел Сулайманов.
Райондалий Ватан дуруччул шин тIитIлатIисса лахъа-хъунсса мажлисрайгу театрданул ­артистътурал бюхттулсса композитор Ширвани Чаллаевлул макьандалухун бивхьунни «Шанма мурхь». ­Инсцениро­вкалул режиссер Марсел Сулаймановлул, авторнал шеърилул мурад баххана къабувну, Хъун дяъвилул иширттая чивчусса поэмалуву хъанахъисса ишру Украиннал аьрщарай нанисса хасъсса аьралий операциялий жанну дуллусса вирттаврал ниттихъал дардирдахагу лащан бувну бивхьунни. ХIасил, театрданул артистътурал лавайсса даражалий ккаккан бунни кIивагу дяъвилул мурадру ватан дуруччаврил цIанийсса бушиву ва ниттихъал дардругу цасса душиву.

Ва инсценировкалущал ­театр гьуртту хьунни Избербаш шагьрулий хьусса «Моя победа» тIисса цIанилусса халкьуннал театрдал XXIII-мур Республикалул фестивальданий. ­Ваний, театрданул даврин лавайсса кьимат бивщуну, Марсел Сулайманов лайкь хьунни ­Культуралул министерствалул чулухасса ­дипломран ва дакIний личIансса бахшишран. ЦIана Халкьуннал театрданул зузалт хIадур буллай бур Дагъусттаннал ­халкьуннал шаэр Сибирбаг Кьасумовлул чивчусса «ЛухIи кьини» тIисса пьеса.

Ларгсса шинал Ватан дуруччайманал кьинилун хас дурсса концертрай вайннал ­бивхьу­ссия цIанихсса шаэртал Расул ХIамзатовлул ва МахIаммад-Загьид Аминовлул шеърирдайнусса «Мурхьру бавцIунмари литIайсса» тIисса цIанилусса, хасъсса аьралий операциялий виричушиврий жан дуллусса Алик Гъазиевлун хас бувсса инсценировка. Тамашачитурал, бивзун лавай, хъатру ришлай, бусраврай кьамул бувссар.

Ва инсценировка ялагу бивхьуссар Лаващиял райондалий «Творческий десант» проектрал лагрулий. Шиккугу лавайсса кьимат бивщуссар халкьуннал театрданул режиссер Марсел Сулаймановлул каялувшиндаралусса коллективрал даврин.