Хъаннил байрандалул кьини МахIачкъалаллал мэр Юсуп Умавов ивунни СВО-лий жанну кьурван дурсса вирттаврал ниттихъачIан, ПатIимат АьбдуллаевачIан ва Саният ХIажиевачIан. Жу хьхьичIвагу бувсъссия, хъунама арснал, Чувшиврул орден ларсъсса Асхад ХIажиевлул Украиннаву жан харж дурсса, хъиривма – Исламлул хьхьиривун бюкьлакьисса инсантал ххассал буллай жан кьурван дурсса иширттая ва вайннал яхIлувсса ниттия.
Юсуп Умавовлул Саниятлул ужагърай кIицI лавгунни, цува мудангу ванил кьянкьашиврул, чувшиврул хIайран увайшиву, духIан захIматсса кьурчIишивуртту бакIрачIан дуркIсса хъамитайпа дурк кьини чувшиврий лахълай бушиву, дакIнил хъиншивугу ядурну.
«Хъунмасса ахъниха зий, захIмат буллалисса Саниятлул хиял бур, цилва къатраву мюрщисса оьрчIал хъяхъаву баянхьуви тIисса. Шамуннава ливчIсса ца чIивима арснал, Мусал, щар дурцуну, ванал наслу ччаннай бацIан буллан ччива тIисса. Укунсса ниттихъул жяматрал оьрмулул ттарцIрур. Тамаша бизансса иш бакъар, гьамин укун яхIлувсса нитти-буттахъал Ватандалул мурадру буруччаврил цIаний жанну ххира къадайсса яхIлувсса арсру тарбия буллалиссагу», – увкунни Юсуп Умавовлул. Ванал барчаллагь увкунни Саниятлухь, шагьрулул администрациялул, жяматийсса ккураннал дуллалисса мероприятиярттай чялишну гьуртту хъанай бушиврухлу, СВО-лун шайсса ка-кумаг буллай бушиврухлу. Шикку кIицI лаганна, Саниятлул чIун-чIумуй дуки-хIачIия, лаххия, аьрай чара бакъа аьркинмур тIайла дуккайшиву, Хуршиловлул цIанийсса кIичIиравусса, СВО-лун ка-кумаг буллалисса штабрайхчIингу, цайми идарарттайхчIингу.
«Жунгу дакIний бикIан аьркинссар, зу кунмасса ниттихъул чIарав бацIлай буссаксса, хIала-гьурттуну буссаксса, жулва шагьрулул билаятрал оьрмулуву агьамсса кIану бугьлагьишиву», – увкунни мэрнал.
Саният ХIажиевалгу барчаллагь увкунни шагьрулул мэрнахь муданнасса къулагъасрахлу. «Юсуп Жанбекович, ина цалчин акъара жул ужагърайн ухлахисса. КьурчIисса кьинирдайгу чIарав авцIунна, хIакьинугу, Хъаннил байрандалий, нагу, на кунмасса ниттихъулгу, хъамакъабивтун бушиву ккаккан буван увкIунна. Ва асар къахьунсса ишгу бакъар. Ина мудангу лякъара ттул дакI цахъисрагу рахIат дуккан дувансса гъилисса махъру. Яла-яларив, жун жулва оьрчIру хъамакъабивтун ччай бур, шагьрулул администрация ва ххуллийгу тамансса давуртту дуллай бур. Жу цинявгу барчаллагьрай буру жулва арсурваврал аьпа уттава буллалисса давурттахлу», – увкунни Саният ХIажиевал.
Мэрнащал бувкIсса администрациялул вакилтуралгу кIицI лавгунни, Саният ХIажиева, ялун бурган кьянкьасса, яхIлувсса бухьурчагу, архIала ттюнгъасса, иминсса бушиву, щавари хьусса дакIнил къювугу тIааьнсса пишлийну кьюлтI дуллай бушиву. «Ва багъраву зузаврил бувгьуну бура, инсаннан къумашивручIа зун, ци-дунугу дуллан аьркинну бикIайсса бур, шайкун давривун кьувтIуну. Щавуй ка дишинмигу чIарату чан къашай. Вайннай цинявннайн барчаллагьрай бура, цахъисрагу ттулла дакI аьчух дуккан дуван буллалисса хIарачатрахлу», – тIий бур вирттаврал нину Саният ХIажиева.
ПатIимат Рамазанова
