Хъаннил байрандалул кьини ДР-лул ХIукуматрал председатель Аьбдулмуслим Аьбдулмуслимовлул паччахIлугърал наградартту дуллалисса мажлис хьунни.
Шадлугърал мажлисрай гьуртту хьунни ДР-лул БакIчинал Администрациялул ва ДР-лул ХIукуматрал каялувчи МахIач Оьмаров, Халкьуннал Мажлисрал председательнал хъиривчу Камил Давдиев, Мюхчаншиву дуруччаврил советрал секретарь МахIаммад Бааьчилов, Аьрасатнал Виричу Тамирлан АбутIалимов.
Наградарттан лайкь хьуминнавух бия чIявусса оьрчIру тарбия бувсса ниттихъул, хасъсса аьралий операциялул гьурттучитурал ниттихъул, кулпатру, ссурвал ва цIуллу-сагъшиву дуруччаврил, культуралул, кIулшивуртту дулаврил аралуву захIмат буллалисса душру-хъами.
Мажлис тIитIлай, Дагъ­у­стт­аннал бакIчи Сергей Меликовлул чулуха байран барча тIий, ихтилат бунни Аьбдулмуслим Аьбдулмуслимовлул.
– Ххирасса ниттихъул, душрув! ДакIнийхтуну барча буллай ура Хъаннил байрандалущал. Хъинну тIааьнну бур интнил цалчинсса гьантрайсса байран жула ххирасса ниттихъан, ­ссурвавран, кулпатирттан хас дурсса душиву. Зуйри дуниял дарцIуну дусса, зуятур оьрму байбихьлахьисса. Дунияллий гьарица ххуймур, тIааьнмур зуцIун дархIусса дур. Гьай-гьай, ва ччанавккусса заманнай жунма бигьану бакъар. Зу бусса оьрмулий зула оьрчIал ххари буллай битаннав, дакIнийсса мурадру бартлаганнав, паракьатсса, рахIатсса оьрму ялун бучIаннав, – увкунни ванал. Хъирив премьер-министрнал дуллунни наградартту. Цалчин сахIналийн лахъан бунни хасъсса аьралий операциялул гьурттучитурал ниттихъул ва аьралийтуран чялишну кумаг буллалисса душру-хъами.
– ХьхьичIва-хьхьичI барча­ллагь учин ччай ура хIакьину Ватандалул мюхчаншиву ­дуручлачисса, къучагъсса арсру тарбия буллалисса цинявппагу ниттихъахь. Гьарица чIумал билаятрайгу, республикалийгу, дакьаву ва паракьатшиву дуруччаву мурадрай, хъаннил хъуннасса хъар лархъун най буссар. Хасъсса аьралий операциялул ишру нанисса ппурттувугу цимилгу исват хьунни жула ниттихъал дакIурдил сахаватлувшиву ва чумартсса тIуллу. ­Чансса ­бакъар аьралийтуран кумаг буллай, чIарав бацIлацIисса ­ниттихъул. Зу кунма ас-ламус бусса, уздансса ниттихъал дуллалисса дугърисса тIуллал жула жагьилтуравун гьавас бутлай бур аьралий бигарду лайкьну биттур буллан, – увкунни Аьбдулмуслим ­Аьбдулмуслимовлул.
Наградартту дуллуминнавух бия хасъсса аьралий операциялул гьурттучи Закария Аьлиевлул нину Халисат Аьлиева. ­Ванин дуллунни жагьилсса ник патриот зумуну тарбия даврихлу дулайсса, Совет Союзрал кIийла Виричу АхIмад-Хан Султаннул цIанийсса медаль.
ДакIнин бутанну, Закария Аьлиев, дукан-хIачIан дакъа, шаннахъул нюжмардий ­ВСУ-лул пункт бувгьуну ивкIшиву. Ва къучагъшиврухлу Закария ­Аьлиев лайкь хьушиву «За проявленное мужество» тIисса ­медальданун.
АхIмад-Хан Султаннул цIанийсса медаль дуллунни Ватандалул ххуллий жан дуллусса Банас Кутурчаевлул ниттин Уммуризан ва чIявусса оьрчIру цайминнан эбратну тарбия ­буллалисса Кисран ХIусайнован. Хъирив премьер-министрнал награда дуллунни Донецкаллал Халкьуннал Республикалий аьралий бурж бартбигьлай къучагъну жан дуллусса Вагьаб Багьауттиновлул кулпат Майсаратлун. ­Ванин дуллунни «За милосердие и благодеяние» тIисса хIурматрал лишан. Аьбдулмуслим Аьбдулмуслимовлул бувсунни, хасъсса аьралий операциялий къучагъну жан дуллусса ласнал аьпалун хас бувну аьралийтуран янна дурухлахисса «Zов героев» тIисса цIанилусса цех тIивтIусса Майсарат Багьауттиновая. Ва цехраву Майсарат бур аьралийтуран гъилисса гъухъри, ссурссу ларкьусса, дахьра ца лажин дакъа къачIалачIисса, куклусса кьяпри ва спальный ­мешокру бурухлай. Хасъсса ­аьралий операция ­наниссаксса хIаллай ванил дурурххуну дур 800-нния лирчусса термобелье ва балаклавартту дусса комплектру.
Мажлисрал лагрулий ДР-лул культуралул министр ­Зарема Буттаевал дуллунни «ДР-лул культуралул лайкь хьусса зузала» тIисса бусравсса цIа «ЧIавалачин» журналданул ­редактор Сиянат ХIажиеван.
Ва кьини Аьбдулмуслим ­Аьбдулмуслимовлул 40-нния ливчусса ниттихъан-хъаннин дуллунни паччахIлугърал наградартту.