Вай гьантрай Москавлив ДР-лул ХIукуматрал председатель Аьбдулмуслим Аьбдулмуслимов хьунаавкьунни Аьрасатнал шяраваллил хозяйствалул министр Оксана Лутлущал.
Вайннал ххал бивгьунни республикалул агропромышленностьрал комплексрал агьамми бутIри лябуккан баврил масъалартту – ппиринж, къюмайтIутIи бугьаву, ризкьи ябаву, «Технологическое обеспечение продовольственной безопасности» нацпроект бартдигьавривух гьуртту шаву, шяраваллил хозяйство зузалтрал дузал даву ва цаймигу.
Дагъусттаннал премьер-министрнал региондалул бакIчи Сергей Меликовлул ва циняв хъузалтрал цIанияту Оксана Лутлухь барчаллагь увкунни федерал министерствалул чулухасса кабакьулухлу.
БакIрай премьер-министрнал Аьрасатнал министрнахь бувсунни ларгсса шинал ДР-лул Шяраваллил хозяйствалул бакIлахъру ласавриву хьун дурсса ккаккиярттая. Ванал тIимунийну, сурсатру ласаврил индекс хьуну бур 106,1%. Шяраваллил хозяйствалул сурсатирттал лагру хьуну дур 252 млрд къуруш.
Лябуккулул бущилул чулуха Дагъусттан бусса бур Аьрасатнал регионнаву цалчинми ацIунниву. ДукIу Дагъусттаннай дартIссар къюмайтIутIул бакIлахърулул 300 азарда тонна, ми хъанахъиссар Совет Союзрал чIумал куннасса. 2024-ку шинал мукунна ларсъссар республикалий яла хъунмур бакIлахъру ппиринжралгу –165 азарда тонна.
Аьбдулмуслимовлул министрнахь тавакъю бунни ризкьи баврил бутIуцIун кабакьу буван. Тавакъю бунни ризкьи бавриву зузиминнан аьрщарал участокру личIи дуван. Хьунабакьаврий ххал бивгьунни цамургу масъала – ппиринж бугьаврил бутIуцIун кабакьаву. Цанчирча тавакъюрду буллай бусса бур Дагъусттаннал ппиринж Аьрасатнал цайми регионнайн тIайла буккаврил хIакъираву, гьарза хъанай дур ми иширттацIунссагу харжлугъру. Ххал бивгьунни мукунма къюмайтIутIи бугьансса аьрщив гьарза даврил масъалагу. Премьер-министрнал Аьрасатнал министрнахь тавакъю бунни ва масъала бартбигьингу кумаг буван.
Ихтилат хьунни «Технологическое обеспечение продовольственной безопасности» тIисса нацпроект бартдигьаврил хIакъиравугу. Мунил ца подпроект хъанай дур «Кадры в АПК».
Аьбдулмуслимовлул бувсунни дузрайн къабувксса масъаларттавасса ца хъанай бушиву шяраваллил хозяйствалул зузалт биял хъанай бакъашиву. ЦIанасса ппурттуву тIалавну усса ур 3 азара инсан.
Ххал бивгьунни селекциялуву ва генетикалуву элмийсса давуртту дуллансса шартIру дузал даврил, аграрий дуккаврил учреждениярттал капремонт даврил хIакъиравусса ва цаймигу масъалартту.
