Ахъушиял райондалийсса лакрал щархъавасса ца дур тIахIунтту дай сянатрал дунияллийх машгьур дурсса жул Бархъаллал шяравалу. Жул жяматрава чансса бувккун бакъар, хаснува ларгмур ттуршукулий, шяраваллил цIа-кьини хъиннура бюхттул дансса дуккаврил пишакартал. Минная гьарная личIи-личIину бусан лайкьссар.
ХIакьинурив жун, 60-ку шиннардий дуклай бивкIсса оьрчIан, бусан ччай бур чIярусса шиннардий Бархъаллал школалул завучну, директорну ивкIсса хIурмат бусса учитель Маммаев МахIаммад Маммаевичлуя.

Ванал захIматрал ххуллу байбивхьуну бур школалий пионервожатыйну. Ми шинну жун, танийсса дуклаки оьрчIан, тачIав хъамакъаританну дакIний лирчIунни. Цукун ххуйну хьунадакьайссия жу Интнил хьхьу! Щаллусса кьини щирпи ратIлай къаврду бувну, маркIачIанмай МахIаммад Маммаевичлущал БюргъицIал-Зунттул мицIлийн лахъайссияв Интнил хьхьунил къавтIи бичин. Зунттул бакIрая цIарал чанна лахъан бувсса лагма-ялттусса кIанттурду ца караматну чIалан бикIайва. Хъунмасса къавтIигу бивчуну, ял­тту ххяхлай, мадара хIаз ласайссия. ДакIний бур, аьрщи дирххун, «ИНТ» тIисса махъ цIу дирхьуну лахъан бувну бивкIсса. Интнил хьхьу тай шиннардий ляличIинура дакIний личIансса шайва.
Директорну зузисса чIумалгу, каялувчинал къайгъурду чIявусса бунугу, МахIаммад Маммаевичлул чIун лякъайва дуклаки оьрчIащал гьарица мероприятиялий гьуртту хьун. ЩутIу-Зунттуйх хьуну, бахьтта лагай­ссияв концертру ккаккан дан КIундив. ХIаллил бакIуйхчин лагайссияв Уручрав. КIива группа къавтIалтрал буссия: 10-мур классрал дуклаки оьрчIая хьусса хъуниминнал группа ва 5-мур классрал оьрчIая хьу­сса мюрщиминнал. Укунсса дакIний личIансса аьрххирду МахIаммад Маммаевичлущал, школалул художественный самодеятельностьрал каялувчитал Куса МахIаммадовичлущал ва РахIим Оьмаровичлущал жул чIявусса хьуссар. Школалий дуллалисса цумур-цагу мероприятиялий МахIаммад Маммаевич оьрчIавух хIала цувагу гьур­тту шайссия. Цалчинмур майрал байрандалул кьини, зюннав-дачIулущал, ттугъгу бувгьуну, дуклаки оьрчIал колонна школалия шяраваллил майданнив, миччагу клубравун дучIайссия. Микку дуклаки оьрчIал хIадур дурсса концертрал программа ккаккан дайссия МахIаммад Маммаевичлул скрипкалухун.
Тай шиннардий школалийсса дарсру РахIим Оьмаровичлул зарядкалия дайдишайссия. Хъирив, цинявппа дуклаки оьрчIру бавтIун, МахIаммад Маммаевичлул политинформация байссия. КIул байссия дуклаки оьрчIру дунияллийсса цIусса хавардащал, бусайссия «Пионерская правда» кказитрай бивщумуния. Мукун кIул хьуссия жун Совет Союзрай арцу даххана дуллай бушиву. ДакIнийри МахIаммад Маммаевич буслай ивкIсса: утти­нин качарданул кило 8-10 къурушран диркIхьурча, уттиния тихуннай 70-80 кIапIикIран дикIантIиссар тIий. Бусайва жухь Юрий Гагарин ва цаймигу космонавтътал аьламравун леххаврия. Та чIумалсса кказитирттай дия «Анжела Девислун –тархъаншиву» тIисса лозунгругу.
МахIаммад Маммаевич шяравусса циняв иширттавухгу чялишну гьуртту шайва. ДакIния къадуккай 1992-ку шинал Бархъарав цалчин Шяраваллил кьини дуллалисса чIун. Аьдатрайн бувну, ххуллун рурцуну, шяраваллил майданния байран дайсса кьанив бияннин, сайки ца километралул манзилданий, ца лахIзалийссавагу акъавцIуну, къавтIий най ивкIсса МахIаммад Маммаевич. Цува авцIусса кIану чIюлу буллалисса ия.
Учительгу ия ва лавайсса даражалул. Дарс дишайва, мудан оьрчIахь хъярч-махсартту буллай. Му кьяйдалий лахьхьин бувмур оьрчIан ххуйну дакIнийгу личIайва.
Астрономиялул дарсирай аьрщарал кIушиврия бусласисса МахIаммад Маммаевичлухь дуклаки душнил хъярчирай цIувххуна: «Аьрщарал кIушиврува ттул кIушиву дуккан дан хьунтIиссарив?» – куну. МахIаммад Маммаевичлулгу жаваб дуллуна: «На аьрщи дуциннин зуруй щябикIан насу», – куну. Ванан кIула бувхсса, бавкIусса оьрчIру таза буккан бан.
Давриву дакI дирхьусса, дазу-зума дакъа цала жямат ххирасса, аьчухсса, аьмал-хIал бавкьусса инсан ия МахIаммад Маммаевич.
Пионервожатыйная, математикалул учительная айивхьуну, директорнайн ияннин зий, ванал хъунмасса захIмат ­бивхьу­ссар оьрчIру тарбия баврил ва миннан куртIсса кIулшивуртту дулаврил ххуллий.
Жу, тай шиннардийсса дуклаки оьрчIая ва учительтурая сакин хьусса группа, Бархъаллал школалун МахIаммад Маммаевичлул цIа дулун бакIцIуцIаву ду­ллай буру. Жу тIутIимур хъин чулий ккаклай бур шяраваллил жяматрал вакилтал, усттарсса шахматист Къиштили МаматIиев ва Аьрасатнал лайкь хьусса хIакин, профессор Нажмуттин Къаллаев. Умуд бур, шяраваллил жяматгу, цIанасса школалул коллективгу жува тIутIимуницIун бавкьуну, Бархъаллал школалун 100 шин шаврицIун бавхIуну, ва жула пикри дузрайн буккан бан хьунссар тIисса.
РяхцIалку шиннардийсса
дуклаки оьрчIал
ва учительтурал группа.

Масъалалул хIакъираву цIухху-бусу бан бюхъайссар ва номерданий: 8-960-418-05-10.
ХIадур бувссар
Андриана Аьбдуллаевал