Февральданул 27-нний МахIачкъалалив хьунни ДР-лул Халкьуннал Мажлисрал 41-мур сессия. Ва бачин бувну ия Халкьуннал Мажлисрал председатель Заур Аскандаров.
Сессиялул байбихьулий махъру лавхъунни фракциярттал депутатътурал. АьбдулвахIид Лабазановлул (КПРФ) гьаз бунни зунттал территорияртту лядуккан даврил, муницIунсса жяматийсса сиптардацIун кабакьаврил масъала. Депутатнал тIимунийну, зунттал шяраваллал ялапарлувтал чялишну гьуртту хъанай бусса бур дузалшиндарал ва инфраструктура лядуккаврил давурттавух, ххуллурду ва щинаххуллурду буллай цалла арцух.
АьбдулвахIид Лабазановлул пикрилий, аьркинну бур паччахIлугърал чулуха кумаг буллан ххуллурду буван, ми бакьин буван, газ буцин ва электроэнергиялул дузалшин ххуй дуван. Мукунсса кумаг булларча, шяраваллил инсантал шагьрулийнмай къабизлан тIий бур.
Марат Алияровлул (Справедливая Россия – За правду) бувсунни аьркинну бушиву муниципалитетирттай низамрайн дуцин инвестициярдал картарду ва дузал буван бизнесрацIун кабакьаврил информациялул центрду.
ДГУ-рал ректор, депутат Муртазяли Рабадановлул (Единая Россия) гьаз бунни дуккаврил качествалул масъала. Ванал тIимунийну, халкьуннал хозяйствалуву аьркинсса пишакартал биялну бакъасса бур, республикалий дяхтта дуклакисса студентътурал аьдад яларайсса дур, дянивну ларсъсса билаятрайминнаяр. Мунияту биялну бакъасса бур инженертал, технологтал ва техникалул элмурдал пишакартал.
Дуккаврил системалуву хъунмур захIматшиву ЕГЭ-лул хIасиллу яларайсса душиву дур. Мунияту КIулшиву дулаврил ва элмулул министерствалун аьркинну бур му масъала дузал буван.
ХIукму хьунни республикалул парламентрал дуккаврил бутIувусса захIматми масъалартту ххал бигьин кьатIув шайсса (выездной) заседаниялий.
Яла депутатътурал ххал бивгьунни кьинилул масъалартту.
Миннал ДР-лул Счетная палаталул аудиторнал къуллугърай цIакь унни АхIмад МахIаммадов. ДР-лул Адвокатътурал палаталул квалификациялул комиссиялувун парламентрал вакилталну бувчIунни Славиди Аьппасов ва Руслан ХIажигереев. Дахханашивуртту дурунни ДР-лул административ правонарушениярттал хIакъиравусса Кодексраву, «О государственных наградах Республики Дагестан» тIисса ва цаймигу цIана зузисса законнаву.
Депутатътурал кабакьу бунни «Заслуженный мастер народных художественных промыслов Республики Дагестан» тIисса цIа дулаврил закондалул проектрацIун. Заур Аскандаровлул бувсунни аьркинну бушиву сянаткаршиврул давурттал (ремесленной деятельности) реестр дузал дуван, муния кумаг хъанан тIий бур халкьуннал усттаршиврул сянатру (промыслы) ядуван ва республикалул усттаршиву, магьиршиву лядуккан дуллан.
Парламентрал спикернал ва масъалалул хIакъиравусса тапшурлугъру дунни Экономикалул политикалул, инвестициярдал ва ишбажаранчишиврул комитетрайн ва исполнитель властьрал органнайн.
Тамансса дискуссияртту хьунни депутатътурал дахханашивуртту дуллалисса чIумал «О статусе и границах муниципальных образований Республики Дагестан» тIисса Дагъусттан Республикалул Закондалуву.
Сессиялий ххал бивгьунни цаймигу масъалартту.
