Ларгсса нюжмардий, Аьрасатнал МЧС-рал ца яла хьхьичIавамур ва хьхьичIунмур вузраву, Екатеринбург шагьрулийсса Уральский институтраву (ГПС МЧС) Аьрасатнал СВО-лул цалчинма Виричу НурмахIаммад ХIажимахIаммадовлун хас дурсса мероприятие хьунни.

Курсантътуращал ва преподавательтуращал хьунадакьин дуркIун дия Виричунал нину Сапижат Мазаева, Аьрасатнал Президентнал Дагъусттаннал Постпреднал хъиривчу, «Каспий» батальондалул командир Табир Маликов, Свердловскаллал областьрайсса Дагъусттаннал ХIукуматрал вакил ХIажи Аьбдулкаримов ва цаймигу бусравсса хъамал. Вайннан цал институтраву экскурсия бувна, бувсуна вузрал тарихрая. Бивуна музейравунгу. Сапижатлул музейран пишкаш бувна НурмахIаммадлуясса луттирду.

«На цаппара луттирду булав институтрал каялувчинал бурж чIумуйну бартбигьлагьисса полковник Игорь Постновлу­хьхьунгу, гьашину ду­ккавриву яла хьхьичIунсса курсантнахьхьунгу. Яла актовый залдануву Чувшиврул дарс хIисаврайсса мероприятие хьу­нни. ЧIявусса курсантътал бия. Ттухьхьун чIявусса суаллу бу­ллуна. Лайкьсса арс тарбия уваврихлу лавай бивзун барчаллагь учин ччай буру тIиссагу хьуна. ДакIний ливчIунни, ттул арс кунмасса Вирттал хъамакъабитаншиврул ци ду­ллан аьркинссар, тIисса суал. Нагу маслихIат бував, СВО-лия бувкIсса чиваркIуннащал ччя-ччяни хьунабакьлан, СВО-лийсса Вирттаврал гьунардая, оьрмулул ххуллия буслан, шайкун миннал чIарав бацIлан, иширайну къахьурча, дакI дуван­сса мукъуйну. Залдануву Дагъусттаннаяссагу мадарасса курсантътал бия. Инсантурал оьр­мурду ххассал буллансса пиша – ца яла алвагьмур бур, жулваминнавугу мудан дугъришиву, кумаг бан ччишиву хьхьичIунну дикIай. Вайннахьгу кIицI лагав, гьарцагу ниттин личIи бакъа вай оьрчIру ххирашиву, гъурбатрайгу Дагъусттаннал цIа-кьини адаврай ядуванну къуццу тIун аьркиншиву.

Табир Сакитовичлухьхьун буллуми суаллу хъунмурчIин аьралий иширттацIун бавхIусса бия. Курсантътуран хьунабакьаврий дакI даркьушиву чIалай бия. Гьарма, бакIра-бакIрах гъан хъанай, барчаллагь тIий ия. Ттун вайннал аьчухшиву асар хьуна. Екатеринбурграя на шаппай бувкIра, НурмахIаммад так ттула дакIниву акъагу, ванал оьрмулул ххуллия, гьунардания кIулсса гьарманал дакIурдиву ушиврий дакI дарцIуну. Барчаллагьрай бура, укун ххуйсса курсантътал тарбия буллалисса институтрал хъуниминнайнгу, ттувувагу ххуйсса асарду гьузиххин буваврихлу. Вирттал дакIурдиву бушиврувур жулва гуж буссагу», – увкунни Сапижат Мазаевал, аьрххилул мурадрая буслай.

ПатIимат Рамазанова