Февральданул 21-нний Дагъусттаннал паччахIлугърал педагогикалул университетраву хьунни Ниттил мазрал кьинилун хас бувсса ккуркки стол.

Шикку гьуртту хьунни ДР-лул миллатрал политикалул ва диндалул иширттал министр Энрик Муслимов, Аьрасатнал жяматийсса ва политикалул ишккакку, политолог, машгьурсса журналист Руслан Кьурбанов, ДГПУ-рал кIулшивуртту дулаврил ва методикалул даврил проректор Ибрагьим Дибиров, ДГПУ-рал тарбиялул ва социал даврил проректор Руслан Гереев, «Чистое сердце» ихIсандалул фондрал вице-президент Меседо Садруттинова, Ингушнал Республикалул мазру лахьхьаврил центрданул вакилтал, республикалул кказит-журналлал редактортал, мазру ябаву ва буруччаву мурадрайсса проектирдаха зузисса аьлимтал, школардай ниттил мазрал дарсру дихьлахьисса учительтал.

Мероприятиялул сиптачину увккунни АьФ-лул ПаччахI­лугърал Думалул депутат Сайгидпаша Умаханов. Шикку гьуртту хьусса цинявппагу пишакартал бия ниттил мазурдий дакI цIуцIисса, мазру буруччаврил буруккинттарайсса. Ихтилатругу бия мюрщи миллатирттал мазру бухлаган къабитансса чаранну лякъавриясса.
Ккуркки столданул дуллалисса давурттаясса ва гьурттучитал барча буллалисса ихтилат бунни Энрик Муслимовлул.

– Укунсса хьунабакьавурттая мюнпат бакъа къабикIайссар. ЦIана ниттил мазру ябаврил масъалартту чIявуну гьаз буллай бур. Жува ялапар хъанай буру, цалва-цалва мазру ва лугъатру, чIявусса миллатру бусса республикалий. Миллатирттал мазру хъанахъиссар жула культуралул, ирсирал ца яла агьаммур бутIану. Тарихрал исват буллай бур ниттил мазрал чулухунмай биччи бакъулшиву дуллалисса миллатрал культура, багьу-бизу ва цуппа миллат бухлагайшиву. Мунияту, хьхьичIва-хьхьичI нитти-буттал, хъирив учительтурал аьркинссар оьрчIавун ниттил мазру лахьхьаврил чулухуннайсса ччаву дутан, – увкунни Энрик Муслимовлул.
Ккуркки столданул гьурттучитурал бувсунни ниттил мазрал дарсру дихьлахьисса учительтурал масъаларттая.

– ХIакьину шикку жува гьаз буллалисса масъалалущал цинявппагу миллатру хьунабакьлай бур. Инсантал зунттава шагьрурдайн бизавугу ниттил мазрай гъалгъа тIутIими чан шаврил ца багьана хъанай бур. Нитти-буттахь ихтияр дур оьрчIан цанма ччимур маз лахьхьин бансса. ХIайп, чIявуминнал цала ниттил мазраяр чил билаятирттал мазру хьхьичIун ласлай бур. Ттул пикрилий, маз хьхьичIва-хьхьичI гъалгъатIи бан аьркинссар кулпатраву. Муния ливчуну мукьах, школардайгу му лахьхьин­сса ххуйсса шартIру дузал дан аьркинссар. Гъалгъа тIий бу­ссакссар маз яшайсса. ХIакьину жунма ябан багьлай бур жува лявхъусса буттал кIанугу, жува гъалгъа тIутIисса ниттил мазгу, – увкунни Руслан Кьурбановлул.

БувчIлай бур так укунсса батIавурттайну маз ябан къахьуншиву. Ци чулийгу, вай масъаларттая гъалгъа тIий, дакI цIий бушивугу хъунмасса зат бур. Мунияту, хIакьину жунма аьркинну бур, гьарцаннал цала каши-кьудрат ишла дурну, ва масъалалул ялув зун.

Меседо Садруттиновал хьхьичIунну дуклакисса ва вузрал иширттаву чялишсса гьурттушинна дуллалисса студентътуран буллунни ИхIсандалул фондрал чулухасса стипендияртту ва Барчаллагьрал чагъарду. Ккуркки столданул даврил хIасиллу дуллай, ванил кIицI лавгунни, ниттил мазру ябаву ва буруччаву, ялун нанисса никирал оьрчIаву ниттил мазрахсса, миллатрал культуралухсса ччаву ххи даву мурадрайсса ххуллу-чаранну.