Мартрал 3-нний Дагъусттаннал бакIчи Сергей Меликов хьунаавкьунни Аьрасатнал ХIукуматрал председательнал цалчинма хъиривчу Денис Мантуровлущал.
Миннал ххал бивгьунни промышленность лядуккан даврил ва предприятиярттан кумаг бансса чараннал хIакъиравусса цаппара масъалартту.
Миннувух ххал бивгьунни Дагъусттаннал промышленность лядуккан даврил фондрал давурттал масъалагу. Фондрал кумаграйну бюхълай бур бартдигьин промышленностьрал производствардал модернизациялул инвестициярттал проектру ва гьарта дуван промышленностьрал производстварду. ХIакьинусса кьини Дагъусттаннай фондрал арцуйнусса кабакьу бувну бур 34 проект бартдигьин, миккун 790 млн къуруш итадаркьуну.
Хьунабакьаврий ххал бивгьунни мукунма региондалул промышленностьрал предприятиярттал зузалтран харжру лахъ баврил ва мукунма уссал промышленностьраву яларай дурсса страховой взносирттал тариф ишла даврил масъала. Республикалий бартдигьлай бур «Город обувщиков» тIисса проект, мунил лагрулий дузал буван тIий бур 1600 зузи кIану.
