ХIакьину, билаятрай захIматсса тагьар хIасул хьусса ппурттуву, аьлтту хъанай бур унгу-унгусса патриотътал. Хасъсса аьралий операциялий гьуртту хъанахъисса аьралийтал кумаграх, аякьалух мюхтажну бушиву бувчIлай, шайсса кумаг буллай, чIарав бацIлай бур жула инсантал. Вай гьантрай МахIачкъала шагьрулул 49-мур школалул директор Аьбдулкарим Айгунов лайкь хьунни «За содействие СВО» тIисса, хасъсса аьралий операциялул гьур­ттучитуран кумаг баврихлусса медальданун. Ва дуллуну дур «Каспий» тIисса Дагъусттаннал добровольчествалул цалчинсса батальондалул чулуха.

Аьралийтурал ва ххуллухьгу ххарину хьунаавкьунни ссайгъа­тирттащал увкIсса, цахава аякьалийсса Аьбдулкарим Айгунов. Батальондалул командир Жамал Илиясовлул аьралийтуран кумаг баврихлу Аьбдулкаримлухь барчаллагь увкунни.

Шиккува кIицI лаган, Аьбдулкаримлул ва бур аьралийтурансса гуманитар кумагращал­сса ряххилчинмур аьрххи.
Тихун ачин хьхьичI, «Каспий» батальондалул аьралийтурахь цIуххавугу дурну, вайннал тIалавшиндарайн бувну, ларсун дур оборудование, шартIру дакъасса кIанттурдай аьркин дагьайсса кьай-кьуй, медикаментру, дуки-хIачIия, маскировочный сеткарду, кIараллу, янна ва дуклаки оьрчIал чивчусса ча­гъарду.
Жамал Илиясов бакIчисса батальондалул аьралийтурахь Айгуновлул барча дунни Ватан дуруччайманал кьини ва дулу­нни МахIачкъала шагьрулул мэр Юсуп Умавовлул чулухасса бахшишру. Буллунни аьралийтурахьхьун дуклаки оьрчIал чивчусса чагъардугу.
Аьралийтуран лавсун бувкIсса ссайгъатирттава яла дакI ххари хьунсса хьунни оьрчIал чивчусса чагъарду. Чагъарду ккалаккисса ва цивппа ххари хьушиву бусласисса, оьрчIахь барчаллагь тIутIисса видеогу гьан дунни аьралийтурал.

Жугу барча тIий буру Аьбдулкаримлух дуллусса бусрав­сса награда. Ина дуллалисса гьарица даврил ахир хъиннийн ду­кканнав. Аьралий ишругу къуртал хьуну, жула оьрчIру зана хьусса чIунгу дучIаннав.

Имара Саидова