Ниттил мазрал кьинилун хас дурсса шадлугъ хьунни ГьунчIукьатIрал дянивмур даражалул школалийгу. Ва хIадур дурну дия лакку мазрал дарсирал учительтал Сиянат Къушиевал ва Роза Аьлиевал, шяраваллил библиотекалул хъунмур Жамилат Юсуповал, шяраваллил Культуралул къатрал директор Закарижа Дандамаевлул.
Шадлугъ дачин дурну ия 9-мур классрал дуклаки оьрчI Артур Аьлиев. Ва кьинилун хасну сакин дурсса программа дия хъинну авадансса. Дуклаки оьрчIал пасихIну ва дюхханну дурккуна назмурду, хъунмурчIиннив ГьунчIукьатIрал шяравасса автортуралми. ХIадур дурну дия мукунна цала шяравасса шаэртурал ва чичултрал луттирдал выставкагу «ГьунчIукьатIрал чичрурду» тIисса.
Дуклаки оьрчIал увкуна балайрду, бивзуна къавтIун, ккаккан бувна Ибрагьим-Халил Кьурбанаьлиевлул «Зунттал большевиктал» тIисса произведениялувасса сценкагу. Ва кьини дуклаки оьрчIан цанмагу, ва шадлугърай хьусса махъсса хъамаллурангу уттинин къакIулну бивкIсса ягу хъамабитала хьусса произведениярттугу, вайннул авторталгу кIул хьуна. Хъамаллив, кьатIувсса тIабиаьтрал шартIирдах къабурувгун, хIатта шагьрулия бувкIссагума бия: ГьунчIукьатIрал шяраваллил ккурандалул хъунама ХIажибутта ХIусайнов, ванал хъиривчувтал Зиябуттин ХIажимирзаев ва Кьурбанаьли Ибрагьимов, Лакрал райондалул администрациялул зузала ТIагьир АхIмадов.
Вайгу гьурттуну вара кьини школалий тIиртIуна «Виричувнал парта» – ва шяравасса, ва школалий дуклай ивкIсса, СВО-лий ватандалухлу жан дуллусса жагьил Руслан Къардашовлун цIа кусса. Хьуна къучагъ ва школалий дуклакисса чIунну дакIнин дичлачисса хъин-хъинсса ихтилатру.
Бадрижамал Аьлиева
